“Лукашенко сиёсий маҳбуслар ҳаёти учун жавобгар” — Германия президенти

Александр Лукашенко режими мухолифатчи сиёсатчилар Мария Колесникова, Максим Знак ва Беларусда “фақатгина қонун, эркинлик ва демократияга чақиргани сабаб” қамоққа олинган бошқа одамларнинг ҳаёти учун жавобгардир. Бу ҳақда Германия президенти Франк-Валтер Штайнмайер сиёсий сабабларга кўра ватанини тарк этишга мажбур бўлган ёки ўз қарашлари туфайли ҳибсга олинган санъаткорлар, мухолифатчилар ва бошқа одамларга бағишланган Берлиндаги нутқида айтиб ўтди.

“Бугунги кечада биз кетиш орқали нажот топа олмаган, балки ўз ватанида таъқибга учраган ёки қамоқда ўтирганлар ҳақида ўйлаймиз”, — деди Германия давлат раҳбари.

Штайнмайер Беларусда сиёсий маҳбуслар сақланадиган қамоқхона шароитлари ҳақида ҳам гапирди.

“Биз қамоқхона шароитлари ойлар давомида ёмонлашиб, шафқатсизроқ бўлиб бораётганини, маҳбусларга етарлича тиббий ёрдам кўрсатилмаётганини, улар учун адвокат ёрдамини олиш имкони йўқлигини, улар бир неча ой давомида танишларинини кўрмаганини биламиз”, —деди у.

“Мен Лукашенкога қатъий мурожаат қилмоқчиман: сизнинг режимингиз бу одамларнинг ҳаёти учун жавобгар. Биз кўзимизни узмаймиз. Мария Колесникова, Максим Знак ва бошқаларни унутмаймиз!” — таъкидлади Штайнмайер.

Беларусда Мария Колесникованинг таъқиб қилиниши

Германиянинг Штутгарт шаҳрида 12 йил яшаган мусиқачи Мария Колесникова 2020 йилда Беларусга қайтиб кетганди, у президентлик сайловларида иштирок этиш ниятини эълон қилган собиқ банкир Виктор Бабарико штаб-квартирасининг координатори бўлган. Бабарико ҳибсга олинганидан кейин Колесникова “мухолифатчи учлик”га қўшилди ҳамда Светлана Тихановская ва Вероника Сепкала билан бирга сайлов кампаниясида қатнашди.

Колесникова 2020 йил сентябрь ойида Беларусь Жиноят кодексининг учта моддаси бўйича айбланиб ҳибсга олинди: миллий хавфсизликка зарар етказишга қаратилган ҳаракатларга оммавий чақириқлар, давлат ҳокимиятини конституцияга зид йўллар билан эгаллаб олиш учун тил бириктириш ва экстремистик тузилма яратиш.

2021 йил сентябрь ойида Колесникова 11 йилга озодликдан маҳрум этилди. 2021 йил декабрь ойи охирида Беларусь Олий суди ёпиқ мажлисда ҳукмни ўз кучида қолдирди. Май ойида Беларусь КГБ Колесниковани “террорчилар рўйхати”га киритди.