Тошкентда кучли таъсир қилувчи дориларни товуқлар остига яширган шахс қўлга олинди, деб хабар беради Давлат божхона қўмитаси матбуот хизмати.
Қайд этилишича, Сирдарё вилояти божхона бошқармаси Контрабандага қарши курашиш бўлими ходимлари томонидан Давлат хавфсизлик хизмати ҳамда Божхона қўмитасининг Контрабандага қарши курашиш бошқармаси ходимлари билан ҳамкорликда тезкор тадбир ўтказилган. Тадбирда Тошкент шаҳар Шайхонтоҳур туманида олдиндан кузатувга олинган шахс ўтирган Lacetti автотранспорт воситаси тўхтатилиб, холислар иштирокида кўздан кечирилган.
Натижада, автомашина салонининг орқа ўриндиғидаги қоғоз қутида турган товуқлар тадбир иштирокчиларининг эътиборини тортган. Текширув давомида паррандалар остига буғдой кепаги билан ниқоблаб яширин бўлма ҳосил қилингани ва уларнинг ичига 241 дона “Мидакс” номли кучли таъсир қилувчи дори воситалари яширилгани маълум бўлган.
Мазкур қонунбузарлик ҳолатини илдизи билан бартараф этиш мақсадида тезкор тадбир Наманган шаҳрида давом эттирилиб, фуқаролардан бирининг яшаш хонадони ва ёрдамчи хоналари кўздан кечирилган. Кўздан кечириш давомида бу ерда истиқомат қилувчи шахс 1 дона қоғоз қутида 236 дона “Мидакс” номли кучли таъсир қилувчи дори воситаларини ўз ихтиёри билан тақдим этган.
Иккала ҳолатда ашёвий далил сифатида олиб қўйилган, хорижда ишлаб чиқарилган, аммо сифатини тасдиқловчи ҳеч қандай ҳужжатлари бўлмаган жами 477 дона дориларнинг умумий қиймати дастлабки ҳисоб-китобларга кўра 143 миллион сўмдан ошмоқда.
Ҳозирда ушбу ҳолатлар юзасидан божхона органлари томонидан жиноят ишлари қўзғатилган.
Психотроп моддалар савдоси
Бундан олдин Сирдарёда психотроп дорилар савдоси билан шуғулланган шахслар қўлга олингани, ДХХ Тожикистон ва Қирғизистондан олиб келинган гиёҳвандлик моддалар савдоси билан шуғулланувчи шахсларни ушлагани, Тошкент вилоятида ўтказилган назорат-рейд тадбирларида синтетик гиёҳванд воситаларини тайёрловчи лаборатория ташкил қилган шахслар қўлга олингани тўғрисида хабар берилганди.
Изоҳ (0)