АҚШ Ҳарбий-ҳаво кучлари ARRW (Air-Launched Rapid Response Weapon) дастури доирасида гипертовушли ракета прототипини синовдан ўтказди. Бу март ойида АGM-183А гипертовушли ракетаси парвози муваффақиятсизликка учраганидан кейинги синов, деб ёзади Defence News ҳаво кучлари баёнотига таяниб.
Синовлар 19 август, шанба куни бўлиб ўтган. Boeing B-52H Stratofortress стратегик бомбардимончи самолёти АRRW дастури доирасида ишлаб чиқилган Lockheed Martin АGM-183А гипертовушли ракетасини Калифорниянинг жанубий қирғоқлари яқинида учирган. Синов муваффақиятли ўтгани ёки йўқлиги ҳақида хабарда айтилмаган.
Март ойидаги муваффақиятсизлик
Март ойида АҚШ Ҳарбий-ҳаво кучлари котиби Фрэнк Кендалл Ҳарбий ҳаво кучлари АGM-183А прототипини синовдан ўтказганини, бироқ у муваффақиятсизликка учраганини эълон қилганди. АҚШ Ҳарбий-ҳаво кучлари ҳисоботига кўра, синовда “бир нечта мақсадларга эришилган, муҳандислар кейинги таҳлил учун маълумотларни тўплаган.
Март ойидаги муваффақиятсизликни эълон қилар экан, Кендалл АGM-183А лойиҳасининг тақдири яна иккита синовдан кейин ҳал қилинишини айтди.
Bloomberg таъкидлашича, АҚШга бундай қуроллар Хитой ва Россияга қарши туриш учун керак. 2022 йилда Пентагон шу турдаги ракеталар ишлаб чиқарилишига старт бериши керак эди, аммо прототипларни синовдан ўтказишдаги муваффақиятсизликлар туфайли бундай бўлмади. АҚШ Ҳарбий-ҳаво кучлари ишлаб чиқариш 2023 йилнинг кузида бошланишини ваъда қилди.
Изоҳ (0)