Баъзан яқин инсонларнинг қадрини уларни йўқотгач англаймиз. Ўзбек санъаткорлари орасида турмуш ўртоғидан айрилгач, унинг қадрини янада яхшироқ ҳис қилганлар ҳам бор.
“Аёлимга суяниб қолган эканман”
Актёр Ёдгор Саъдиев онасидан кейин турмуш ўртоғига суяниб қолгани, унинг вафотидан сўнг ёлғизликни ҳис қилгани ҳақида куюниб гапиради.
— Афсуски, яқинларимизнинг борида қадрига етмас эканмиз. Онамнинг вафотидан сўнг турмуш ўртоғимга суяниб қолган эканман. Аммо буни вафот этганидан сўнг англадим. Мен учун борини аямайдиган, эътибор берадиган инсон эди. Кўринишимдан мен қаттиққўл кўринсам-да, тарбияда у талабчан эди. Ҳабибуллоҳ ва Мунисхон ҳам болаликда онасидан кўпроқ ҳайиққанлари ҳақида кўп гапиришади.
Турмуш ўртоғим санъацҳунос бўлгани учун у билан кино ва театр ҳақида соатлаб суҳбатлашиш мумкин эди. Турмуш ўртоғим болалигим, санъатга кириб келишим, ролларим ҳақида кўп сўрарди. “Анави расм қаерда, бунисини қаердан олсам бўлади?” дерди. Кейин билсам, у мен ҳақимда китоб ёзмоқчи бўлган экан. Туғилган кунимда китобни қўлимга тутди. Аммо ўша пайтда китобни тўлиқ ўқиб, унга миннатдорлик билдиролмаган эканман. Вафотидан кейин китобни бир неча марта ўқиб, менга бўлган меҳри нақадар кучли бўлганини ҳис қиляпман, — дейди Ёдгор Саъдиев.
Эркин Комилов шахсий ҳаётида кўплаб синовларни бошдан кечирган. Хусусан, аёллари вафот этган, беш фарзанд билан ёлғиз қолган.
.jpg)
— Фотима ва Зуҳра қизларимнинг онаси юрак хуружи билан 24 ёшида вафот этган. Болалар менда қолиб кетди, у кунлар ўтди. Кейин устозим Шукур Бурҳоновнинг ёрдами билан болалар театрида ишлайдиган Мўтабар исмли бир қизга уйландим. Аллоҳ фарзандлар берди, 44 ёшида у ҳам вафот этди. Беш қизимни ўзим узатдим, ўғилларимни тўй қилдим.
Ундан кейин барибир эркак киши уйланмаса бўлмас экан, уй ишлари, ўзим кўчада юрсам, овқат, дазмол қилиш дегандек, аёл киши эркакнинг орқасида қолгани яхши экан. Ўзимдан ўтганини ўзим биламан, мана ҳозир ҳеч нарсани кўрмагандек бўлиб кетдим. Ҳозирги аёлим Маҳбубанинг баҳоси йўқ, менга қарайди, шифокорим ҳам, ошпазим ҳам Маҳбуба. Шукрки, 61 ёшимда яна бир бор оталик бахти насиб этиб, ўғлим Оловуддин дунёга келган, — дейди Эркин Комилов.
Ғайрат Усмонов: “Ўғлим ҳар куни онам қачон келади, деб йиғларди”
“Кулсанг” қўшиғи билан мухлислар қалбидан жой олган хонанда Ғайрат Усмоновнинг ҳаётида мудҳиш воқеа содир бўлган. У автоҳалокат сабаб бир кунда меҳрибон аёлидан айрилган.
— Раҳматли биринчи аёлим оқила, берухсат остона хатлаб кўчага чиқмайдиган инсон эди. Бир куни қўнғироқ қилиб “Жияним билан шифохонага бориб келсам майлими? Менга шерик бўлинг, деб илтимос қиляпти”, деди. Ўйлаб ўтирмасдан йўқ дедим, аммо 3-4 қадам юргандан кейин “Бу ҳам кун бўйи уч бола, уй ишлари билан овора бўлиб, кўчага ҳам чиқмайди. Майли, борақолсин, кўнгли ёзилиб келади”, деб рози бўлдим.
Эртаси куни эрталаб кийимларимни тахт қилиб ёнимга келди. Телефонини бериб, шунга “Кулсанг” қўшиғингизни ёзиб беринг, қўнғироқ қилганингизда шу қўшиқ эшитилсин, деди. У содда аёл бўлганидан ҳатто телефонга қўшиқ юклаб олишни ҳам билмасди. Қўшиқни юклаб берганимдан кейин хуш кайфиятда кетди. Юз-қўлимни ювиб, хизматга отланаётган пайтимда телефоним жиринглади. Ўша пайтда ички ишлар соҳасида ишлайдиган танишим бор эди. “Фалончи жиянингиздан хабар олиб қўйинг, касалхонада экан”, деди. Аёлим у билан бирга эди-ку, деб унга қўнғироқ қилдим. Телефони ўчирилган эди. Хуллас, орадан ҳеч қанча вақт ўтмай, автоҳалокат ҳақида хабар келди. Воқеа содир бўлган жойга бориб, машинани таний олмадим. Хуллас, у йилларда солиқчилар ноқонуний савдо билан шуғулланаётганларни қувиши урф бўлганди. Махсус ходимлар қоидани бузиб, қарама-қарши йўлга ўтиб, автоҳалокатга сабабчи бўлишган.
Аёлим ўша ернинг ўзида вафот этган. Ўшанда кенжа ўғлим икки ярим ёшда эди. “Онам қачон келади?” деб роса инжиқланган. Ҳатто эсини таниб қолган пайтларда ҳам маҳалламизга тез ёрдам машинаси келса, “Онамни олиб келишдими?” дерди. Ундан кейин иккинчи марта оила қурдим. Ҳозир беш фарзандга ота-оналик қиляпмиз, — дейди Ғайрат Усмонов.
Оғабек Собиров: “Бундай тақдирни ҳеч кимга раво кўрмайман”
“Қизғалдоқ” фильмини томоша қилганмисиз? Мазкур фильмда хонанда Оғабек Собировнинг биринчи турмуш ўртоғи билан содир бўлган қайғули воқеалар акс эттирилган.
— Тоғамнинг қизига уйлангандим. Афсуски, бевақт дард сабаб у оламни эрта тарк этди. Бу даврларни эслаш мен учун жуда оғир. Уни эсласам худди яна ўша даврга тушадигандек, ўзимни ёмон ҳис қиламан. Ярам янгиланаверади. Бундай тақдирни ҳеч бир инсонга раво кўрмайман.
Оиламиздаги мудҳиш воқеа — фарзандларимнинг онаси оламдан ўтгандан кейин, уларни бир умрга эслатиб турадиган ёдгорлик сифатида кино суратга олсак, деган маслаҳатлар бўлган. Бу таклифни кутмаган эдим. Ўйлаб қарасам, бу ҳам савоб, ибрат бўлади. Микойил Сулаймонов фильм сценарийсини ёзган, Иброҳим Расулов фильмни суратга олган. “Қизғалдоқ” фильми асосан реал воқеаларга асосланган, — дейди Оғабек Собиров.
Изоҳ (0)