Ўзбекистонда 2022 йилда энг кўп фойда кўрган ва энг кўп зарар кўрган давлат иштирокидаги корхоналар рўйхати эълон қилинганди. Унда “Ўзбекистон миллий электр тармоқлари” йилни 4,34 триллион сўм зарар билан якунлагани қайд этилганди. Акциядорлик жамияти бунинг сабабларидан бирини маълум қилди.
Қайд этилишича, акциядорлик жамиятининг молиявий фаолияти бўйича асосий даромади — электр энергиясини ягона хариди ва сотишидан шаклланади. Яъни, ҳисобот бўйича асосий зарарни маҳсулот (товар, иш ва хизмат)ларни сотиш ҳажмига мувофиқ тарзда, 2022 йилдаги фаолият якунига кўра ялпи зарар 4,34 триллион сўмни ташкил этган.
“Ўзбекистон миллий электр тармоқлари” АЖ зарар билан ишлашига асосий сабаб, Вазирлар Маҳкамаси ҳузуридаги Идоралараро тариф комиссиясининг 7-, 10- ва 12-сонли баёнлари билан тасдиқланган тармоқ ички тарифларига асосан, электр энергиясини сотиб олиш (ўртача 388,1 сўм) ва сотиш (ўртача 348,8 сўм) нархлари орасидаги манфий тафовут натижасида ҳар бир кВт/соатдан 39,3 сўм зарар эвазига ҳудудий электр тармоқлари корхоналарига етказиб бергани туфайли эди.
“Яъни аксиядорлик жамияти электр энергияси қиммат харид қилиниб, арзон сотилгани учун зарар кўрган”, — дейилади “Ўзбекистон миллий электр тармоқлари” матбуот хизмати изоҳида.
Мисол тариқасида 2023 йилнинг 1-чорагида электр энергиясини ишлаб чиқарувчи корхоналардан жами 18,6 млрд кВт/соат электр энергияси ўртача ҚҚС билан 426,2 сўмдан харид қилиниб, Ҳудудий электр тармоқ корхоналарига 18,8 млрд кВт/соат ҳажмда ўртача 405,4 сўмдан сотилгани, яъни ҳар бир кВт/соатдан 20,8 сўмдан зарар кўрилгани келтириб ўтилган.
Хабарда айтилишича, “Ўзбекистон миллий электр тармоқлари” АЖ 2023 йил учун тасдиқланган Бизнес режасида ҳам жорий йилдаги фаолияти зарар билан якунланиши назарда тутилган.
Изоҳ (1)
Давлатдан олинадиган субсидиячи? Давлат ахолига бериладиган Хар бир КВ электр учун ЭТК га адашмасам 500сум атрофида пул ту́лаб беради. Хурматли дарё мухбирлари Хар бир маълумотни ту́гри етказинглар. Ахолини алдаманглар. ЭТК га бериладиган субсидия хам аслида халкни пули!!!