Тошкент вилоятида 1,3 млрд сўмдан ортиқ электр энергиясидан ноқонуний фойдаланган кўп қаватли уйлар аниқланди

Бош прокуратура ҳузуридаги департамент Тошкент вилоятида электр тармоқларига ноқонуний уланиш ҳолатларини аниқлади.

Қайд этилишича, департаментнинг Оҳангарон бўлими томонидан ўтказилган терговга қадар текширувларда “Ф.Й.” ХУЖМШ ва “О.К.” МЧЖ масъул шахслари ҳудуддаги 10 та кўп қаватли уйга ўрнатилган лифт ҳамда кўча ёритиш чироқларини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, жами 908,6 миллион сўмлик электр энергиясидан ноқонуний фойдаланиб келганликлари аниқлаган.

Шу каби, департаментнинг Янгийўл шаҳар бўлими томонидан ўтказилган терговга қадар текширувда “С.Э.” МЧЖ масъул шахслари 22 та кўп қаватли тураржой биносини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, жами 472,3 млн сўмлик электр энергиясидан ноқонуний фойдаланиб келганликлари аниқланган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.

Электрдан ноқонуний фойдаланиш ҳолатлари

Ўзбекистонда июнь ойида 6,1 миллиард сўмлик электрдан ноқонуний фойдаланилгани аниқланганди. Ноқонуний фойдаланиш ҳолатларининг энг кўпи Андижон, Самарқанд ва Қашқадарё вилоятлари ҳиссасига тўғри келган. Шунингдек, Навоийдаги хусусий корхонада 195 дона майнинг қурилмалар ўрнатилиб, 9,6 миллиард сўмлик электр энергиясидан ноқонуний фойдаланилгани, Ўзбекистонда май ойида 20,6 миллиард сўмлик электр энергиясидан ноқонуний фойдаланиш ҳолатлари аниқлангани тўғрисида хабар берилганди.