Япония ҳукумати Гавайидаги Мауи кучли ёнғинлардан жабрланганларга ёрдам сифатида 2 миллион доллар ажратади. Бу ҳақда Япония ташқи ишлар вазирлиги маълум қилди.
“Гавайидаги ўрмон ёнғинлари етказган вайронкор зарар туфайли Япония Америка Қизил Хоч ва Япония платформаси орқали табиий офат оқибатларини бартараф этиш чораси сифатида жами 2 миллион долларга яқин ёрдам кўрсатишга қарор қилди”, — дейилади вазирлик баёнотида.
Ўрмон ёнғини Гавайидаги Мауи оролида 9 август куни бошланган. Кучли шамол туфайли ёнғин тезда Лахайна сайёҳлик шаҳарчасига ўтиб, оқибатда шаҳар бутунлай ёниб кетган. Сўнгги маълумотларга кўра, 100 дан ортиқ одам ҳалок бўлган, камида 4,5 минг киши бошпанасиз қолган.
Гавайидаги ҳозирги ўрмон ёнғинлари сўнгги асрдаги энг ҳалокатли ёнғиндир. Губернатор Жош Гриннинг айтишича, штат тарихидаги “энг йирик табиий офат”дан етказилган зарар 6 миллиард долларга баҳоланган.
Изоҳ (0)