Швейцария Европа Иттифоқи томонидан қабул қилинган Россияга қарши санкцияларнинг 11-пакетига қўшилди. Бу ҳақда Швейцария ҳукумати – Федерал кенгаш маълум қилди.
Бугун 16 августда Федерал Кенгаш Россияга қарши янги чораларни маъқуллади ва шу орқали Европа Иттифоқи томонидан 11-санкциялар пакети бўйича қабул қилинган чекловларга қўшилди, дейилади кенгаш баёнотида.
Шу муносабат билан Швейцария Иқтисодиёт вазирлиги “ўз ваколатлари доирасида санкция режимини Россиянинг 100 дан ортиқ янги шахс ва ташкилотларига қўллайди”.
Хусусан, Россиянинг 87 та корхонасига иккиламчи мақсадли, шунингдек, “Россиянинг ҳарбий ва технологик жиҳатдан мустаҳкамланишига ҳисса қўшиши мумкин бўлган” товарларни сотиш тақиқланади.
Бу компаниялар орасида Россияга ушбу турдаги маҳсулотларни етказиб берган учинчи давлат корхоналари ҳам бор. Бундан ташқари, экспорт қилиш тақиқланган компаниялар рўйхати кенгайтирилди.
Маълумот учун, Швейцария НАТО ва Европа Иттифоқига аъзо эмас. Шунга қарамай, Украинада уруш бошланганидан бери Россияга қарши қўлланилаётган санкцияларни қўллаб-қувватлаб келмоқда.
Изоҳ (0)