Истанбулда икки ойга етадиган сув захираси қолди — “А-haber” телеканали

Иссиқ ва қуруқ ёз туфайли Истанбулдаги сув захиралари норманинг 33,4 фоизигача камайди, бу 2014 йилдан бери энг паст кўрсаткичдир.

Охирги маълумотларга кўра, 16 миллионлик шаҳардаги сув ҳавзаларида сув 61 кунга етадиган даражада қолган, деб хабар берди “А-haber” телеканали маҳаллий мерия статистик маълумотларига таяниб.

Ушбу маълумотларга кўра, метрополиядаги 10 та сув омборидан 6 тасида сув захираси меъёрдан 20 фоизга камайган. 

Мерия сув хўжалиги бошқармасидан олинган маълумотларга кўра, шаҳар тўғонларида сув захираси норма бўйича 868,7 миллион куб метрни ташкил қилиши керак. Ҳозир улар 290 миллион куб метргача камайди.

2014 йил август ойида вазият янада оғирроқ эди, ўшанда сув захиралари 150 миллион куб метрни ташкил этганди.

Истанбулдаги энг паст сув сатҳи 2014 йилнинг март ойида қайд этилган бўлиб, у меъёрнинг 28,9 фоизини ташкил қилган.