НАТО бош котиби офиси раҳбари Стиан Йенссен Украина ўз ҳудудларининг бир қисмини Россияга бериши эвазига НАТОга аъзо бўлиши мумкинлигини айтганди.
Медведев бунинг учун Украина “Киевдан ҳам воз кечиши” кераклигини таъкидлади. Зеленский офиси эса Украина НАТОга аъзо бўлиш учун ҳудудларини алмашмаслигини маълум қилди.
Ушбу муносабатлар фонида Стиан Йенссен унинг тегишли таклифи хато бўлганини маълум қилди.
“Менинг бу борадаги баёнотим Украинанинг келажакдаги эҳтимолий сценарийлари ҳақидаги кенгроқ муҳокаманинг бир қисми эди ва уни бундай тарзда ифодаламаслигим керак эди. Бу хато эди”, — деди у.
Йенссеннинг резонансли баёноти
Йенссен урушни якунлаш вариантларидан бири сифатида Украина Россияга ҳудудларининг бир қисмини бериши мумкинлигини айтди. У бу вариант асосида Украина НАТОга аъзо бўлиши ҳам мумкинлигини таъкидлади.
“Менимча, урушни якунлашнинг бир ечими Украина ҳудудларидан воз кечиб, эвазига НАТОга аъзо бўлишидан иборат бўлиши мумкин”, — деди НАТО бош котиби офиси раҳбари.
У Украина қачон ва қандай шароитда Россия билан музокаралар олиб боришни хоҳлашини ўзи ҳал қилиши кераклигини билдирди.
“Шундай бўлиши керак, деб айтмаяпман. Аммо бу эҳтимолий ечим бўлиши мумкин”, — дея хулоса қилди у.
Россия қандай муносабат билдирди?
Россия Хавфсизлик кенгаши раиси ўринбосари Дмитрий Медведев мазкур таклифни “қизиқ ғоя” деб атади ва Украинанинг “баҳсли ҳудудларига Киев ҳам киришини” айтди.
“Блокка кириш учун Украина ҳатто қадимги руснинг пойтахти Киевдан ҳам воз кечиши керак. Улар пойтахтни Лвовга кўчиришга мажбур бўлади”, — деган Медведев.
Украина мазкур таклифни рад этди
Украина ташқи ишлар вазирлиги НАТОга аъзолик эвазига ҳудудлардан воз кечишни қабул қилиб бўлмаслигини таъкидлади.
“Ҳудудларнинг бир қисмини Россияга бериш эвазига Украина НАТОга кириши ҳақидаги гапларни мутлақо қабул қилиб бўлмайди. Биз ҳамиша альянс Украина каби ҳудудлар билан савдо қилмаслигидан келиб чиққанмиз”, — деди ТИВ вакили Николенко.
Зеленский офиси ҳам бу таклифни ғалати деб баҳолади
Украина президенти офиси раҳбари маслаҳатчиси Михаил Подоляк мамлакат НАТОга аъзо бўлиш учун ҳудудларини алмашмаслигини таъкидлади.
“Ҳудудни НАТО соябони учун алмашиш? Ғалати. Яъни, онгли равишда демократия мағлуб бўлувчи йўлдан бориш... халқаро ҳуқуқни йўқ қилиш ва урушни бошқа авлодларга мажбурий ўтказиш”, — деди Подоляк
У бунинг ўрнига НАТОга Украинага қурол етказиб беришни тезлаштириш ҳақида эълон қилишга чақирди.
Изоҳ (0)