Тармоқларда Тошкент вилоятининг Олмалиқ шаҳрида қурилаётган кўп қаватли уйлардан бирининг қурилиш талабларига риоя этилмасдан барпо этилаётгани, келажакда бу уйда яшаш инсон ҳаёти учун хавфли экани айтилган видео тарқалганди. Мазкур ҳолатга муносабат билдирган Қурилиш вазирлиги ушбу турар жой биносини қуришда “Зилзилавий ҳудудларда қурилиш” меъёр талаблари бузилгани-ю, геолог далолатномаси ва замин тупроқ қатлами зичлиги бўйича лаборатория хулосалари тўлиқ расмийлаштирилмаган ҳолда қурилаётганини билдирганди.
“Дарё” мазкур воқеани ўрганганда масъуллар 9 қаватли уйнинг юқори уч қавати талабга жавоб бермаслиги, бузилишини билдирганди. Таҳририятга маълум бўлишича, шу тўққиз қаватли уйнинг 7-8-9-қаватлари бузиб ташланмоқда.
Қурилиш ва уй-жой коммунал хўжалиги вазирининг биринчи ўринбосари Шерзод Ҳидоятовнинг “Дарё”га билдиришича, Олмалиқдаги кўп қаватли уйнинг тепадаги — 7-8-9-қаватлари бузиб ташланган.
Қурувчи талабга жавоб бермайдиган уйни бузмагунича уйни топширолмайди, одамлар яшай олмайди, — дейди вазир ўринбосари.
Қурувчининг “Дарё”га билдиришича, у қураётган уйнинг камчиликлари кўринган видеони унга таниш ва у билан ҳамкорликда ишлаган фуқаро тавсирга олган.
Бу видеони менга таниш фуқаро анча аввал тасвирга олган. Ва шу кунларда тарқатди. У уй харидори эмасди. Мен ундан қурилишда керак бўладиган қурилиш асбобларини олиб тургандим. У бериб турган қурилиш асбобининг ижара нархини 80 миллион сўм дегач, бу қиммат арзонлаштиринг дегандим. Кейин нақд бўлса 60 миллион беринг деганди. Пулини бергандим, — деганди видеотасвирлар қандай тарқалганини айтган қурувчи.
Олмалиқдаги кўп қаватли уйнинг қурилиши 2021 йил ноябрь ойидан бошланган бўлиб, лойиҳа қиймати 10,5 миллиард сўмни ташкил қилади. Турар жой биносининг кв/метри аҳолига субсидия асосида 5 миллион 187 минг сўмдан сотилади.
Изоҳ (0)