Статистика агентлиги Ўзбекистоннинг қанча аҳолиси интернет тармоғига улангани ҳақида маълумот берди.
Маълумотларига кўра, 2023 йилнинг 1 январь ҳолатига мамлакатда интернет тармоғига уланган абонентлар сони 26,7 миллион нафарни ташкил этмоқда.
Бу кўрсаткич ўтган йилнинг мос даври билан солиштирилганда 16,3 фоизга ошган.
Ҳудудлар орасида интернет тармоғига уланганлар сони:
- энг кўп абонентлар сони Тошкент шаҳрида — 5,4 миллион;
- энг кам абонентлар сони Сирдарё вилоятида — 0,7 миллион.
2022 йилнинг 1 январь ҳолатига кўра, Ўзбекистонда интернет тармоғига уланган абонентлар сони қарийб 23 миллионни ташкил этган. 2020 йилнинг 1 январь ҳолатига кўра эса интернет тармоғига уланган абонентлар сони 16 миллион 386 минг 200 тани ташкил этиб, 2019 йилнинг мос даврига нисбатан 23,0 фоизга ёки 3,1 миллионтага ўсган.
Ўзбекистонда интернет тезлиги
2022 йил декабрда рақамли технологиялар вазири Шерзод Шерматов Ўзбекистон аҳолисининг интернет хизматидан фойдаланувчилари сони 31 миллиондан ортганини маълум қилганди. Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган.
Республика 2022 йилда дунёдаги симли интернет тезлиги бўйича рейтингда 155-ўринда бўлган. 2023 йилда эса натижалар ўзгариб, 131-ўринга кўтарилган. Яъни ўтган йилги рейтингга нисбатан 24 поғонага ўсиш бўлган. Ўзбекистондаги симли интернет тезлиги 21,67 Мбит/с экани қайд этилган.
Шунингдек, Ўзбекистонда 2023 йил март ойидан бошлаб мобил интернет тезлиги оширилиши ва мамлакат бўйлаб 5G технологияси жорий этилиши тўғрисида хабар берилган эди.
Изоҳ (0)