O‘zbekistonda xizmat ko‘rsatgan artist Ra’no Shodiyeva 12-avgust 44 yoshni qarshiladi. Maftunkor aktrisa hamisha xotirjam ko‘rinsa-da, hayotda ko‘plab sinovlarni yengib o‘tgan. Xo‘sh, u qachondan ijodini boshladi va qanday to‘siqlarni yengib o‘tdi. Keling, bu kabi savollarga javob izlaymiz.
“Men raqqosa bo‘laman”
— Oilada ikkita farzandmiz. Ota-onam akam ikkimizning tahsil olishimiz uchun bor imkoniyatlarni yaratib bergan. Har yili yozda Rossiyadagi eng yaxshi oromgohlarga borib dam olardik. Onam o‘ziga nisbatan e’tiborli va hamisha eng qimmat mualliflik liboslarini kiyardi. Men esa ularni o‘zimga moslab tikib olardim. Ammo onam biror marta buning uchun urishmagan. Liboslarga o‘chligimning sababi raqs bilan bog‘liq. “Raqqosa chiroyli kiyimda raqsga tushishi kerak”, degan tushuncham bor edi. Xullas, bolalikdan faqat raqqosa bo‘laman degan niyat bilan ulg‘ayganman, — deydi aktrisa Ra’no Shodiyeva.
“13 yoshimda kinoga kirib keldim”
— Ilk rolimni 13 yoshimda Qamara Kamolovaning “Atrof oppoq qorga burkandi” filmida ijro etganman. Kinoda suratga tushish va keyinchalik aktrisa bo‘lish hayolimda ham bo‘lmagan. Qamara opa nafaqat rejissor, balki hayotimdagi muallim bo‘lgan. Onam hamisha ishda bo‘lardi, ko‘p narsalarni u insondan o‘rganganman.
Maktabni bitirganimdan keyin qaysi kasbni egallash haqida ko‘p o‘ylaganman. Shunda dadam dizaynerlik bo‘yicha o‘qishni taklif qilgan. “Konstruktor-dizayner” mutaxassisligini egallab, 16 yil davomida atelyeda ishlaganman.
“Tanzila Norboyevaning shaxsiy dizayneri bo‘lganman”
— Opa bilan atelyeda ishlab yurgan paytimda tanishganmiz. Bu sohadan ketganimdan keyin afsuski Tanzila opaga hech narsa qilib bera olmadim. Hali ham o‘zimni kechira olmayapman. Yaqinda ko‘rishganimizda ham ko‘ylak, kostyumlar tikib bersang bo‘lar ekan deb qoldilar. Keyin men Turkiyaga ketib qoldim va bu iltimoslarini bajara olmadim, — deydi aktrisa.
“18 yoshimda ‘Chimildiq’ga chaqirishdi”
— 18 yoshimda Melis Abzalov “Chimildiq” filmiga taklif etdi. Bu rolni teatrda Madina Muxtorova qoyilmaqom ijro etgan. Undek ijro eta olamanmi, deb ikkilangandim. Undan keyin “Shaytanat” filmining kastingiga taklif qilishdi. Rostini aytsam, bu film haqida, umuman asar haqida hech qanday ma’lumotga ega emasdim. Chunki faqat rus tilidagi kitoblarni o‘qirdim. Zaynab roli uchun juda ko‘p aktrisalar kasting topshirishgan, keyin bilsam bu rolni avvaliga Navro‘za Biynazova ijro etgan va qandaydir sabablarga ko‘ra suratga tushishni istamay qolgan ekan. Navro‘za opa bilan bir “dom”da turardik. Munosabatlarimiz juda yaxshi, ammo biror marta nega roldan ketgani haqida so‘ramaganman, — deydi aktrisa Ra’no Shodiyeva.
“Ozodbek Nazarbekov bilan kursdoshman”
— Kinodagi rollarim muvaffaqiyatli chiqishni boshlaganidan keyin bu sohada ham tahsil olishga qaror qilganman. Juda mashhur insonlar Ozodbek Nazarbekov, Halimaxon kabi ijodkorlar bilan kursdosh bo‘lganman. Undan keyin magistraturada ham tahsil oldim. “Qo‘g‘irchoq teatr aktyorligi” bo‘limida tahsil olib, kar-soqov bolalar uchun spektakllar sahnalashtirishni niyat qilgandim. Ammo institutdan ish taklif qilishdi va besh yil davomida ustozlik ham qildim. Ammo institutda ishlab, ijoddan biroz uzilgandek bo‘ldim. Shu bois, ustozlikni tark etib, bor e’tiborimni ijodga qaratdim, — deydi aktrisa Ra’no Shodiyeva.
“Onam sabab xayriya ishlarini boshladim”
— Onam imkoniyati cheklangan bolalarning madaniyat markazida ishlardi. Bir kuni “Sen taniqli aktrisasan, nega menga yordam bermaysan”, deb qoldi. Avvaliga onamni ranjitmaslik uchun xayriya ishlarida qatnashib yurdim. Ammo u yerdagi muhit bilan yaqindan tanishib, bolajonlarga mehrim tushib qoldi. Ular shu qadar mehrliki, insonni o‘ziga ohanrabodek tortadi. Ayni kunda bu sohada nafaqat, onam va men, balki qizim ham faoliyat yuritadi, — deydi aktrisa Ra’no Shodiyeva.
“Turmush o‘rtog‘im bilan boshqa-boshqa insonlarmiz”
— Men toshkentlik, turmush o‘rtog‘im esa qashqadaryolik inson. Aslida dunyoqarashimiz va odatlarimiz ham bir-biriga mos emas. Masalan men noziklikni yoqtiraman, turmush o‘rtog‘im esa chapani samimiy inson. Hatto, yaxshi ko‘radigan narsalarimiz ham bir-biridan farq qiladi. Ammo turmush o‘rtog‘im oilaparvar va ayolini qadrlaydigan inson. Oilamiz uchun hamma imkoniyatni yaratib beradi. Shu kungacha ro‘zg‘or xarajatlari haqida bosh qotirgan inson emasman, — deydi aktrisa Ra’no Shodiyeva.
Og‘ir xastalikni yenggan aktrisa
.jpg)
— Jigarimning 60 foizini olib tashlashdi va sog‘lomini qoldirishdi. Jigar — bu o‘sadigan a’zo. Xudo xohlasa, olib tashlangan o‘sha foizi bir yil davomida yana ham o‘sib, joyiga tushadi. Oson amaliyot bo‘lmadi, juda qiyin, mashaqqatli. Jigarning o‘zi 300 ta funksiyani bajaradi. Unda qon tomirlari ko‘p. Shuning hammasini joy-joyiga tikib, amalga oshirish kerak, — deydi aktrisa.
Ra’no Shodiyevaning “Mehrli qo‘llar”i
— Surdo tili oilamiz uchun yangilik emas. Dadamning eshitish bilan bog‘liq nuqsoni bo‘lgani uchun bolaligimizdan bu tilni o‘rganishga va u orqali dadam bilan erkin muloqot qilishga harakat qilganmiz. 2003-yili uch oylik kursga qatnadim va surdo tarjimoni mutaxassisligini egalladim. Hozirgi kunda bu tilda erkin muloqot qila olaman. Hatto farzandlarim ham buni o‘rganishgan.
Bolaligimdan imkoniyati cheklangan insonlarga befarq bo‘lmaganim uchun “Qo‘llar yordamida gaplashamiz” nomli tashkilotni yo‘lga qo‘ygandim. Undan keyin uning qamrovi yanada mukammallashib, eshitish, ko‘rish, gapirish bilan bog‘liq imkoniyati cheklangan bolalar va yoshlar tashkilotini tuzdik. Hozirgi kunda rahbarligimdagi “Mehrli qo‘llar” yoshlar va bolalar markazi imkoniyati cheklangan qatlam vakillarining hayotga moslashuvchanligini oshirishga o‘z hissasini qo‘shmoqda, — deydi aktrisa Ra’no Shodiyeva.
Mahoratli aktrisa endi buvijon
Aktrisa 2021-yili o‘g‘li Diyorni uylantirdi. Qizig‘i shundaki, uning kelini rus millatiga mansub. Oradan ko‘p o‘tmay qizi Raxshonani ham turmushga berdi. Hozirda aktrisaning ikki nafar nabirasi bor.
“Jigarimning 60 foizi olib tashlandi”
Afsuski, 2022-yili aktrisada jiddiy xastalik aniqlandi.
— Jigarimning 60 foizi olib tashlandi va sog‘lom qismini qoldirishdi. Jigar bu – o‘sadigan narsa. Uning olib tashlangan qismi Xudo xohlasa 1 yil ichida o‘sib joyiga tushadi. 11 soat davom etgan amaliyot oson bo‘lmadi, juda qiyin, mashaqqatli bo‘ldi. Jigarning organizm ishida 300 ta funksiyasi bor, jigarda qon tomirlari ko‘p. Ularning hammasini joy-joyiga qo‘yib tikish kerak bo‘ldi, — deb kasalligi haqida ma’lumot bergandi aktrisa Ra’no Shodiyeva.
U Turkiyada jarrohlik amaliyotini boshdan kechirib, uzoq yillik davolanishdan so‘ng oilasi bag‘riga qaytdi. So‘nggi ma’lumotlarga qaraganda, aktrisaning bugungi kundagi salomatligi joyida, yaqin kunlarda u yana ijodga qaytishni rejalashtirmoqda.
Izoh (0)