Британиянинг РМ Technology таълим технологиялари компанияси томонидан олиб борилган тадқиқот шуни кўрсатдики, мактаб ўқувчилари сунъий интеллект (AI)дан тобора кўпроқ фойдаланмоқда.
Шу билан бирга, ўқитувчилар уй вазифасини ўқувчиларнинг ўзлари бажарганми ёки AI ёрдамидами ҳар доим ҳам ажрата олмаяптилар. Бу ҳақда Sky News хабар бермоқда.
Тадқиқот доирасида 1000 нафар ўқувчи ва 500 нафар ўқитувчи билан суҳбат ўтказилди. Натижалар шуни кўрсатдики, ўқитувчиларнинг 66 фоизи ўқувчилар AI томонидан ёзилган уй вазифаларини мунтазам равишда олиб келишларига ишончлари комил. Шу билан бирга, ўқитувчиларнинг 9 фоизи ўқувчининг иши билан AI бажарган вазифани ажрата олмаслигини тан олди.
Ўқитувчиларнинг 36 фоизи ўқувчилар сунъий интеллектни ўқитувчиларга қараганда яхшироқ тушунишига ишонишади. Шу билан бирга, ўқитувчиларнинг 89 фоизи инсоннинг ақл-заковати, эмпатияси ва ижодкорлиги ўрнини ҳеч қандай сунъий интеллект боса олмайди, деб ҳисоблайди. Шунингдек, ўқитувчиларнинг 12 фоизи мактаб ўқувчиларига сунъий интеллектдан фойдаланишни бутунлай тақиқлаш кераклигига ишончи комил.
Мактаб ўқувчилари ўртасида ўтказилган сўров шуни кўрсатдики, уларнинг 67 фоизи ChatGPT каби чатботлардан, масалан, иншо ёзиш, физика ва математика бўйича масалаларни ечиш, матнларни таржима қилиш, шеър ёзиш ва ҳоказолар учун фойдаланганликларини тан олишди.
Шу билан бирга, мактаб ўқувчиларининг атиги 38 фоизи мустақил равишда топшириқларни бажармаганларида ўзларини айбдор ҳис қилишади. Талабаларнинг 68 фоизи сунъий интеллектдан фойдаланиш орқали яхши баҳо олганликларини айтишди.
Изоҳ (0)