Мактабгача ва мактаб таълими вазирлиги томонидан аҳолига кўрсатилаётган хизматларни рақамлаштириш, Ягона интерактив давлат хизматлари портали орқали кўрсатилаётган электрон хизматлар кўламини кенгайтириш ва янги хизматларни жорий этиш бўйича бир-қатор ишлар амалга оширилмоқда.
Жумладан, жорий йилдан бошлаб мактабнинг 9 ва 11-синфини тугатган битирувчиларга шаҳодатномалар электрон шаклда берилиши йўлга қўйилди.
Ҳукуматнинг тегишли қарори асосида мазкур электрон шаҳодатноманинг давлат намунаси ҳамда шаҳодатномаларни бериш тартиби тасдиқланди.
Айни вақтда электрон шаҳодатнома платформаси (“э-шаҳодатнома.уз”) ишлаб чиқилиб, тегишли вазирлик ва идораларнинг электрон базасига интеграция қилинди.
Бу эса таълим соҳасидаги қоғозбозлик, ортиқча харажат ва оворагарчиликларнинг олдини олишга қаратилган навбатдаги қадам ҳисобланади.
Вазирлар Маҳкамасининг қарори билан таянч ўрта таълим, умумий ўрта таълим тўғрисидаги шаҳодатнома, психик ривожланишида нуқсони бўлган болалар учун ихтисослаштирилган мактабни тамомлаганлик тўғрисидаги сертификатлар электрон тарзда ўзбек ва инглиз тилида шакллантирилади.
Ушбу янгилик ўқувчиларга қандай қулайликлар яратади?
Мактаб битирувчилари энди ўз шаҳодатномасини ёнида олиб юриши талаб этилмайди. Олий ўқув юртига ҳужжат топшириш учун Билим ва малакаларни баҳолаш агентлигининг (собиқ DTМ) “АБITUР” дастурига интеграция қилинган ҳолда ҳужжатларни онлайн топшириш имконияти яратилади.
Шу билан бирга битирувчилар тўғрисидаги маълумотларнинг шаффофлиги ва ҳаққонийлигини таъминлаш учун Адлия вазирлигининг Фуқаролик ҳолати далолатномаларини қайд этиш бўлимлари ҳамда Personaллаштириш агентлигига интеграция қилинади.
Электрон шаҳодатномалар битирувчиларга ҳар йили 20 июнга қадар берилади. Бунинг учун битирувчилар шаҳодатномани электрон платформадан шахсини тасдиқловчи ҳужжатидаги тегишли маълумотларни киритиш орқали бепул юклаб олиши мумкин бўлади.
Энг аҳамиятлиси, шаҳодатномалар йўқолган ёки яроқсиз ҳолга келган тақдирда, битирувчиларга дубликат шаҳодатнома берилмайди. Битирувчилар шаҳодатномани электрон платформадан ўзи истаган вақтда бепул қайта юклаб олиши мумкин бўлади.
Аттестат дубликатини олиш муддати 7 кун қилиб белгиланди. Бу ўқувчи ва ота-оналарнинг вақтини тежаш, уларни ортиқча оворагарчиликлардан халос этишга катта ёрдам бериши аниқ.
Аввал фуқаро аттестат дубликатини олиш учун мактабга бориши, 3 та ҳужжат тақдим этиши ва 30 кунгача кутишига тўғри келган. Бу вақт ва асабнинг беҳуда сарфланишига сабаб бўлган.
Бундан ташқари, хорижий давлатларда умумий ўрта ва ўрта таълим олганлик тўғрисидаги ҳужжатларни тан олиш (ностирификация) бўйича давлат хизмати кўрсатиш ҳам давлат хизматлари маркази ёки “my.gov.уз” электрон портали орқали амалга ошириш йўлга қўйилди.
Вазирлар Маҳкамасининг 2022 йил 1 июлдаги 295-сон қарори билан тасдиқланган регламентларга мувофиқ Ягона интерактив давлат хизматлари портали (“my.gov.уз”) орқали 5 та турдаги давлат хизмати кўрсатиб келинмоқда.
Маълумот учун 2023 йил давомида:
- 35 571 нафар фуқарога шаҳодатнома дубликати берилди;
- 9 307 нафар фуқаронинг экстернат тартибида имтиҳонларда қатнашиш учун аризалари қабул қилинди;
- 684 нафар хорижий давлатда умумий ўрта таълим олган фуқаронинг ҳужжатлари нострификация қилинди;
- 145 нафар чет эл фуқорасининг фарзандлари мактабга қабул қилинди;
- 11 416 нафар ота-она фарзандини бир мактабдан бошқа мактабга кўчириш бўйича давлат хизматларидан фойдаланди.
Мактабгача ва мактаб таълими вазирлиги таълимни рақамлаштириш борасидаги ишларни давом эттирмоқда.
Изоҳ (0)