Ўзбекистон Иқтисодиёт ва молия вазирлиги “Фуқаролар учун бюджет”нинг 2022 йил учун ижросини эълон қилди.
Қайд этилишича, 2022 йилда ЯИМнинг ўсиш суръати 5,7 фоизни ташкил қилган ҳамда ЯИМ ҳажми жорий нархларда 888,3 триллион сўмни ёки 80,4 миллиард долларни (2022 йилда АҚШ долларига нисбатан расмий алмашув курси ўртача 11 051,2 сўм) ташкил қилган.
Давлат бюджети даромадлари 2022 йил якуни билан 201 триллион 863,7 миллиард сўмни ташкил қилиб, прогнозга нисбатан 1 триллион 525 миллиард сўмга ортиқча бажарилди. 2021 йилга нисбатан даромадлар 37 триллион 64,2 миллиард сўмга ошган.
Таъкидланишича, 2022 йилда давлат компаниялари давлат бюджетига 27,2 триллион сўм дивиденд тўлаган.
Давлат божи, жарималардан қарийб 5,6 триллион сўм, хусусийлаштиришдан (маҳаллий бюджетга ўтказилган) 640 миллиард сўм ҳамда транспорт воситаларига давлат рақами белгилари реализациясидан 265 миллиард сўм келиб тушган.
Йирик солиқ тўловчилардан давлат бюджетига солиқ тушумларда Навоий КМКнинг улуши 16,3 фоизни, Олмалиқ КМК улуши 8,6 фоизни ташкил қилган.
Шунингдек, давлат бюджетининг 2022 йил харажатлари 2021 йилга нисбатан 48 триллион 434,9 миллиард сўмга ошган ҳолда 236 триллион 692 миллиард сўмга ижро этилган.
Бундан олдин Олий Мажлис Қонунчилик палатасининг йиғилишида 2023 йил январь–июнь ойларида республика бюджети харажатлари 2022 йилнинг ярим йиллигига нисбатан 25 фоизга ўсгани тўғрисида хабар берилганди. Харажатларнинг тенг ярми ижтимоий соҳага йўналтирилган.
Изоҳ (0)