Қашқадарёда қизнинг шахсий фото ва видеоларини тарқатмаслик учун 400 доллар талаб қилган шахс ушланди

Қашқадарё вилояти Шаҳрисабз шаҳрида фуқарони ижтимоий тармоқларда обрўсизлантирмоқчи бўлган шахс ушланди, деб хабар беради Бош прокуратура ҳузуридаги департамент.

Қайд этилишича, департаментнинг Шаҳрисабз шаҳар бўлими томонидан ИИБ ходимлари билан ҳамкорликда тезкор тадбир ўтказилган. Тадбирда Н. исмли шахс М.А. исмли қизнинг шахсий фото ва видео тасвирларини ижтимоий тармоқларда тарқатиб юбормаслик эвазига 400 долларни талаб қилиб олган вақтида ашёвий далиллар билан ушланган.

Мазкур ҳолат юзасидан Жиноят кодексининг 165-моддаси (товламачилик) ва 141-3-моддаси (шахснинг шаънини ва қадр-қимматини камситувчи ҳамда инсон ҳаётининг сир тутиладиган томонларини акс эттирувчи маълумотларни ошкор қилиш) билан жиноят иши қўзғатилиб, терговга тегишлилиги бўйича юборилган.

Бундан олдин ИИВ Тезкор-қидирув департаменти Киберхавфсизлик маркази томонидан Telegram да “Hello Tashkent, salam Tashkent” номли канал ва гуруҳларни ташкил этиб, уларга фуқароларнинг шаъни ва қадр-қимматини камситувчи видео тасвирларни жойлаштириб келган гуруҳ аниқланиб, қўлга олинганди.

Ўзбекистонда ўзганинг яланғоч фото ёки видеоларини тарқатиш билан қўрқитганлик учун жавобгарлик қандай?

Президент томонидан 11 апрель куни “Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун қабул қилинган.

Қонун билан интим ҳаёт дахлсизлигини бузганлик учун жиноий жавобгарлик белгиланган, яъни Жиноят кодекси қуйидаги мазмундаги 141-3-модда билан тўлдирилган:

“Шахснинг розилигисиз унинг танасининг ва (ёки) жинсий аъзоларининг яланғоч ҳолдаги фото ёки видеотасвирини ўз ичига олган маълумотларни тарқатиш, шу жумладан оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш ёки бундай маълумотларни тарқатиш билан қўрқитиш — базавий ҳисоблаш миқдорининг 400 бараваридан 600 бараваригача (120 миллион сўмдан 180 миллион сўмгача) миқдорда жарима ёки 360 соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.

Ўша ҳаракатлар:

а) такроран ёки хавфли рецидивист томонидан;

б) бир гуруҳ шахслар томонидан олдиндан тил бириктириб;

в) вояга етмаган шахсга нисбатан содир этилган бўлса.

360 соатдан 480 соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади”.