Тошкент вилоятида туризмни ривожлантириш учун дам олиш масканларига вертолётда бориб-келиш имконияти яратилди. Бу ҳақда ОАВ вакиллари учун Бўстонлиқ туманига ташкил этилган пресс-турда маълум бўлди.
Қайд этилишича, Uzbekistan Airways АЖга қарашли хусусий тадбиркорлик субъекти Бўстонлиқдаги Heaven’s Garden дам олиш масканига вертолёт қатновини йўлга қўйган.
Тошкент халқаро аэропортидан йўлга чиққан вертолёт Бўстонлиқ туманидаги дам олиш масканига тахминан 20-25 дақиқада етиб келади. Бир марталик парвоз вақтида 5 нафар йўловчини манзилга олиб бориб, яна 5 нафар йўловчини ортга олиб қайтади. Шундай қилиб, ҳар бир вертолёт кунига 7-8 та парвозни амалга оширади, — дейди Uzbekistan Airways АЖга қарашли хусусий корхона директори Сардор Нурмуҳаммедов.
Масъулнинг маълумот беришича, вертолётдаги парвоз нархи ҳар бир киши учун 1 миллион сўмни ташкил қилади.
Абдурасул Абдухалиловнинг маълумот беришича, президентнинг тадбиркорларга яратиб бераётган имконияти сабаб, шахсан унинг раҳбарлигидаги тадбиркорлик субъектининг даромади 100 бараварга ўсган.
Юртимизда тадбиркорларга берилаётган имкониятлар тадбиркорларнинг иши юришиб, ривожланишига туртки бўлмоқда. Давлат раҳбари яратиб бераётган имкониятлар шу даражада кўпки, ҳали биринчи имкониятни ҳазм қилмасимиздан иккинчи имконият яратилади. Биз бу имкониятлардан фойдалансак, ривожланамиз, — дейди тадбиркор.
Абдурасул Абдухалиловнинг маълум қилишича, у дастлаб тадбиркорлигини 10 киши билан бошлаган бўлиб, айни кунда ишчилари сони 1000 нафардан ортган.
Бизга ишга келган ёшларнинг ҳеч бири ўқимаган. Уларнинг қўлидан ҳеч қандай касб-ҳунар келмасди. Кўпчилиги турли хил дафтарларда турарди. Улар дастлаб овқат ташувчи бўлиб ишлади. Кейин официант бўлишди, кейин катта официант ва менежерлик даражасигача кўтарилишди. Маошлари ҳам кунига 100 минг сўмдан, 150 минг, 250 минг сўмгача, бугунги кунга келиб эса 500 минг сўмгача ошди, — дейди тадбиркор.
Тошкент вилояти ҳокимлиги ахборот хизмати ходими Асқар Исмоиловнинг маълумот беришича, Бўстонлиқ туманига бир йилда 9 миллион киши дам олишга келади.
Бўстонлиқ туманида 5112 та дам олиш уйи ва дала ҳовлилари, 584 та жойлаштириш воситалари мавжуд. Туманда 2020—2022 йиллар давомида 65,1 миллион доллар инвестиция ҳисобига 21 та 2189 ўринли йирик замонавий меҳмонхона ва дам олиш масканлари, 6 та ресторан, рафтинг эко-туризм лойиҳаси, 6 та йирик савдо дўконлари 1 та хусусий клиника қурилди. 65 та оилавий меҳмон уйлари ва узунлиги 3000 метрли 2400 кишини ташиш қувватига эга бўлган “Амирсой Экспресс” ҳамда узунлиги 1600 метр бўлган 2400 киши қувватига эга “Чиноркент” осма дор йўллари ишга туширилди. 2022 йилда туманга йилига жами 5 миллион 891 минг нафар сайёҳ ташриф буюрган бўлса бугунги кунга келиб уларнинг сони 9 миллионга етди, — дейди Асқар Исмоилов.
Тадбиркор Абдурасул Абдухалиловга кўра, улар Хитой давлатидаги тадбиркорлар билан ҳамкорлик қилиб, йилига 100 минг нафар хитойликни Ўзбекистонга олиб келиб, сайёҳат қилдириш бўйича келишувга эришган.
Хитойлик ҳамкорлар билан дам олиш маскани орқасида 15 миллион долларлик аттракционлар боғини барпо қилишни режа қилганмиз, — дейди у.
Изоҳ (0)