Тошкент шаҳар Сергели туманида йўловчи ташувчи автобус йўловчилари билан ЙТҲга учради.
Ҳолат акс этган видео ижтимоий тармоқларда тарқалгач, пойтахт ЙҲХБ ҳолат юзасидан маълумот берди. Унга кўра, 14 август куни соат 15:40 ларда Сергели тумани 4П-21 йўлининг 5-километрида 1973 йилда туғилган I.Б. Саз-Ле 60 русумли автобусни бошқариб келаётиб, рул бошқарувини йўқотиб қўйган. Сўнгра бетон устунга бориб урилиши натижасида йўл-транспорт ҳодисаси содир бўлган. Йўл-транспорт ҳодисаси натижасида автобус ҳайдовчиси — 1973 йилда туғилган I.Б. ва 3 нафар йўловчилари:
- 1983 йилда туғилган Б.Ф;
- 2021 йилда туғилган М.А;
- 2012 йилда туғилган А.Ф.лар тан жароҳати олиб, шифохонага мурожаат қилган.
Шунингдек, “Дарё” ҳолат юзасидан “Тошшаҳартрансхизмат” АЖ ахборот хизмати билан ҳам боғланди. Унда автобус Янгиҳаёт тумани, ТҲАЙ бўйлаб ҳаракатланаётган вақтда, “Атлант” қурилиш моллари дўкони олдида автобус билан бир йўналишда ҳаракатланаётган тиркамали юк машинаси автобуснинг йўналишига халақит бериши натижасида, ҳайдовчи автобусни аввал ўнг тарафдаги “столба”га, сўнг йўлни ажратувчи бетонли тўсиққа урилгани айтилган.
“Тошшаҳартрансхизмат”нинг келтиришича, мазкур йўл-транспорт ҳодисаси натижасида автобусдаги йўловчилар жароҳатланмаган, ҳайдовчи ўнг оёқ тизза пастининг лат ейиш тан жароҳати билан 16-сонли Республика шошилинч тез тиббий ёрдам кўрсатиш марказига юборилган. Бироқ ЙҲХБ уч нафар йўловчи ҳам жабрланганини маълум қилган. Саз Ле-60 русумли автобус техник шикастланган.
Ҳозирда ушбу йўл-транспорт ҳодисаси Тошкент шаҳар ИИББ ЖҲҲ ЙҲХБ ходимлари томонидан ўрнатилган тартибда расмийлаштирилган.
Изоҳ (0)