Мудофаа вазирлиги “Ватан ҳимояси ва эл-юрт тинчлиги йўлида ҳалок бўлган ҳарбий хизматчилар ва ходимлар оила аъзоларини ижтимоий қўллаб-қувватлаш кучайтирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида”ги Вазирлар Маҳкамаси қарори лойиҳасини Норматив-ҳуқуқий ҳужжатлар лойиҳалари муҳокамаси порталига қўйди. Ҳужжат 27 июндан 12 июлгача жамоатчилик муҳокамасида бўлди.
Қарор матнида қайд этилишича, президентнинг “Ватан ҳимояси ва эл-юртимиз тинчлиги йўлида ҳалок бўлган ҳарбий хизматчилар ва ходимлар оила аъзоларини ижтимоий қўллаб-қувватлашни кучайтириш чора-тадбирлари тўғрисида”ги фармони билан ватан ҳимояси ва эл-юрт тинчлиги йўлида яралангани, контузия ёки майиб бўлгани оқибатида ҳалок бўлган ҳарбий хизматчи (ходим)ларнинг оила аъзолари ҳамда уларнинг қарамоғидаги шахсларга алоҳида имтиёз ва кафолатлар белгиланган.
Бундан ташқари, Қуролли Кучлар таркибига кирувчи вазирлик ва идораларнинг ҳарбий хизматчи (ходим)лари томонидан ҳарбий хизмат ўташнинг ўзига хос хусусиятларидан келиб чиқиб, уларга хизмат сафари харажатларини қоплаб беришни тартибга солиш зарурати мавжуд. Шунга кўра, қонунчилик ҳужжатларининг ўзаро мувофиқлигини таъминлаш учун ҳукуматнинг айрим қарорларига тегишли ўзгартириш ва қўшимчалар киритиш талаб этилмоқда.
Муҳокамага қўйилган қонун лойиҳаси билан айрим ҳукумат қарорларига қуйидагиларни назарда тутувчи ўзгартириш ва қўшимчалар киритилади:
- ватан ҳимояси ва эл-юрт тинчлиги йўлида ҳарбий хизматчи (ходим) ҳалок бўлганда давлат мажбурий шахсий суғуртаси доирасида тўланадиган суғурта суммасини белгилаш;
- ватан ҳимояси ва эл-юрт тинчлиги йўлида ҳалок бўлган ҳарбий хизматчи (ходим)ларнинг оила аъзоларига тураржойни ижарага олганлик (ижарада турганлик) учун ҳар ойлик пул компенсация тўлаш тартибини белгилаш;
- ватан ҳимояси ва эл-юрт тинчлиги йўлида ҳалок бўлган ҳарбий хизматчилар (ходимлар)нинг оила аъзолари белгиланган тартибда турар жойга муҳтож деб тан олинганда, уларни узоқ муддатли имтиёзли ипотека кредитларидан фойдаланган ҳолда тураржой билан биринчи навбатда таъминлаш;
- ҳарбий хизматчи (ходим)ларга хизмат сафари харажатларини қоплаб бериш тартибини такомиллаштириш.
Қонун лойиҳасига кўра:
- суғурталанган шахс (ҳарбий хизматчи) 2023 йил 1 апрель ва ундан кейинги даврларда президентнинг тегишли қарорларига асосан фавқулодда ҳолат (уруш ҳолати) эълон қилинган ва (ёки) ҳарбий (жанговар) ҳаракатлар олиб борилаётган даврда яралангани, контузия ёки майиб бўлгани оқибатида ҳалок бўлганда — унинг меросхўрларига (меросхўрлик ҳуқуқини тасдиқлайдиган гувоҳнома тақдим этилган тақдирда) тўловни амалга ошириш кунидаги республикада белгиланган базавий ҳисоблаш миқдорининг 200 баравари миқдорида;
- суғурталанган шахс хизматни ўташ (ҳарбий йиғинлар) даврида ҳалок бўлганда (айрим ҳолатлар бундан мустасно) ёки хизмат (ҳарбий йиғинлар)дан бўшагандан сўнг бир йил мобайнида олинган жароҳат (контузия), касалланиш натижасида вафот этганда — унинг меросхўрларига (меросхўрлик ҳуқуқини тасдиқлайдиган гувоҳнома тақдим этилган тақдирда) тўловни амалга ошириш кунидаги республикада белгиланган базавий ҳисоблаш миқдорининг 84 баравари миқдорида;
- суғурталанган шахс хизматдан бўшагандан кейин бир йил мобайнида унга хизматни ўташ (ҳарбий йиғинлар) билан боғлиқ бўлган ногиронлик белгиланганда: I гуруҳ ногиронлиги бўлган шахсга — б-пунктдаги тўлов (БҲМ 84 баравари)нинг 75 фоизи, II гуруҳ ногиронлиги бўлган шахсга — 50 фоизи, III гуруҳ ногиронлиги бўлган шахсга — 30 фоизи миқдорида;
- суғурталанган шахс хизматни ўташ (ҳарбий йиғинлар) даврида оғир жароҳатланганда — БҲМ 84 баравари тўловнинг 20 фоизи ва енгил жароҳатланганда 10 фоизи миқдорида суғурта пули тўлайди.
Ҳалок бўлган ҳарбий хизматчилар ва ходимларнинг оила аъзоларига тураржойни ижарага олганлик (ижарада турганлик) учун ҳар ойлик пул компенсацияси ҳалок бўлган ҳарбий хизматчи (ходим)нинг оила аъзоларига уларнинг мулки (номи)да тураржой бўлмаган тақдирда тўланади.
Пул компенсацияси ҳалок бўлган ҳарбий хизматчининг янги никоҳга кирмаган турмуш ўртоғи ва (ёки) ҳалок бўлган ҳарбий хизматчининг қарамоғида бўлган ота-онасидан бирига тўланади.
Ҳалок бўлган ҳарбий хизматчининг янги никоҳга кирган турмуш ўртоқларига, кейинчалик улар янги никоҳидан ажрашганида ёки бева қолганида пул компенсацияси тўланмайди.
Тураржойни ижарага олганлик (ижарада турганлик) учун пул компенсацияси ҳалок бўлган ҳарбий хизматчининг оила аъзоларига, амалдаги сарф-харажатлар доирасида (коммунал хизматлар ҳақи бундан мустасно):
- Тошкент шаҳрида – БҲМнинг тўрт бараваригача миқдорда;
- Нукус шаҳрида ва вилоятлар марказларида – БҲМнинг уч бараваригача миқдорда;
- Ўзбекистон Республикасининг бошқа шаҳарлари, туманлар марказлари ва аҳоли пунктларида – БҲМнинг икки бараваригача миқдорда тўланади.
Пул компенсацияси олувчи ҳалок бўлган ҳарбий хизматчининг оила аъзоси (турмуш ўртоғи, ота-онасидан бири) билан бирга яшайдиган оила таркиби уч киши ва ундан ортиқ бўлган тақдирда (пул компенсацияси олувчи шахсни ҳисобламаган ҳолда) пул компенсацияси миқдорлари 50 фоизга оширилади. Бунда пул компенсацияси олувчи оила аъзоси билан бирга яшайдиган шахслар (ҳалок бўлган ҳарбий хизматчининг фарзандлари, ҳарбий хизматчи ҳаётлигида фарзандликка олган шахслар, ҳарбий хизматчининг оила аъзолари томонидан фарзандликка олинган шахслар, хизматчининг қарамоғидаги ота-онаси, шу жумладан турмуш ўртоғининг ота-онаси) ҳисобга олинади.
Изоҳ (0)