Россия Қозоғистон ва Ўзбекистоннинг газ соҳасида ҳамкорлигига бошқа давлатлар ҳам қўшилиши мумкин. Бу ҳақда “РИА Новости”га берган интервьюсида Россия ТИВ иқтисодий ҳамкорлик департаменти директори Дмитрий Биричевский маълум қилди.
“Газ соҳасида уч томонлама ҳамкорликни кенгайтириш имкониятини истисно қилмаймиз. Бунга бошқа давлатлар ҳам қизиқиш билдираётганини биламиз. У барча иштирокчилар позициясини ҳисобга олувчи, ўзаро манфаатли ва конструктив бўлиши кераклигини англаган ҳолда бундай ҳамкорликка очиқмиз”, — деган у.
Россия президенти Владимир Путин 2022 йилнинг ноябрида газни Қозоғистон ва Ўзбекистон ҳудуди орқали ташиш бўйича ҳаракатларни мувофиқлаштириш учун Ўзбекистон иштирокида “уч томонлама газ иттифоқи” тузишни таклиф қилганди.
Ўша йилнинг декабрида Ўзбекистон энергетика вазири Жўрабек Мирзамаҳмудов Ўзбекистон қўшни давлатлардан газ ва электр энергиясини қандайдир альянс ёки иттифоқ орқали эмас, балки тижорат шартномалари асосида импорт қилиш ниятида эканини айтган.
2023 йил 18 январь куни “Газпром” Қозоғистон билан, 24 январь куни Ўзбекистон билан газ соҳасида ҳамкорликни ривожлантириш бўйича йўл харитаси имзоланди. 16 июнда эса Россия газини Ўзбекистонга етказиб бериш бўйича шартнома ва республика газ узатиш тизимини Россия газини қабул қилишга тайёрлаш бўйича йўл харитаси имзоланди.
Унга кўра, UzGastrade АЖ ва “Газпром экспорт” МЧЖ ўртасида 2 йил муддатга газ олди-сотдиси бўйича шартнома тузилди. Шартнома доирасида 2023 йилнинг 1-октябридан кунига 9 миллион кубометр табиий газни импорт қилиш бошланиши мўлжалланмоқда. Йиллик ҳажм эса қарийб 2 миллиард 800 миллион метр3 ни ташкил этади.
Изоҳ (0)