Нигерда ҳокимиятни эгаллаган исёнчилар АҚШ давлат котиби ўринбосари Виктория Нуландга агар бошқа давлатлар вазиятга ҳарбий йўл билан аралашса, ағдарилган президент Муҳаммад Базумни ўлдиришини айтди. Бу ҳақда Associated Press хабар берди.
Исёнчилар америкалик дипломатнинг шу ҳафта Нигерга ташрифи чоғида унга тегишли огоҳлантиришни етказди. АҚШ расмийси бу маълумотни тасдиқлади.
26 июль куни ҳокимиятдан ағдарилган Базум ўз уйида гаровга олинган. Исёнчиларнинг мурожаати Африка давлатлари Нигерга 25 минг нафар ҳарбий юбормоқчилиги ва Франция ҳарбийлари Базумга қарши бўлган миллий гвардияга “ҳужум қилгани” фонида янгради.
Нигерия 25 минг нафар ҳарбий контингентнинг ярмини беришга тайёр, қолганини Кот-дʼИвуар, Сенегал ва Бенин беради. Нигерия ҳарбийлари бу кучларга бошчилик қилади.
Ғарбий Африка давлатларининг иқтисодий ҳамжамияти (ECOWAS) конфликтни куч ишлатиш билан ҳал қилиш сценарийсини экстремал вариант сифатида кўрмоқда.
Нигерда ҳарбий тўнтариш
Нигерда 26 июль куни ҳарбий тўнтариш содир бўлди. Президент гвардияси давлат раҳбари Муҳаммад Базумни ҳокимиятдан четлатди. Икки кундан сўнг президент гвардияси бошлиғи генерал Абдураҳмон Тчиани ўзини янги давлат раҳбари деб эълон қилди.
ECOWAS мамлакатлари Нигерга ҳарбийларни киритишга тайёрлигини эълон қилди. Бунга жавобан давлат тўнтаришлари натижасида ҳокимиятга келган ҳарбийлар томонидан бошқариладиган Мали ва Буркина-Фасо “Нигер ишларига ҳар қандай ҳарбий аралашув уларга қарши уруш эълон қилиш билан баробар бўлишини” билдирди
Изоҳ (0)