Нигердаги ҳарбий тўнтаришдан сўнг, 5 августга келиб минтақадаги вазият кескинлигича қолмоқда. Ғарбий Африка давлатлари иқтисодий ҳамжамиятига (ECOWAS) аъзо давлатлар Қуролли кучлари қўмондонлари исёнга жавобан Нигерга эҳтимолий бостириб кириш режасини ишлаб чиқди, деб хабар бермоқда Франциянинг RFI медиа компанияси.
“Қўмондонлар томонидан маъқулланган тавсияномада эҳтимолий аралашувнинг барча элементлари, шу жумладан, бунинг учун зарур ресурслар, қўшинларни қандай ва қачон жойлаштириш кабилар айтилган”, — дея агентлик ECOWAS’нинг сиёсий масалалар, тинчлик ва хавфсизлик бўйича комиссари Абдул-Фатав Мусонинг сўзларидан иқтибос келтирди.
ECOWAS давлатлари раҳбарлари ушбу тавсия асосида ҳаракатланиш бўйича қарор қабул қилиш устида ишламоқда.
Нигерия пойтахти Абужада иттифоқчи давлатлар раҳбарларининг уч кунлик йиғилиши бўлиб ўтди. Унда Нигерия президенти Бола Тинубу мамлакат Сенатини Нигерга қуролли бостириб кириш чорасини маъқуллашга чақирди. ECOWAS’га раислик қилувчи Тинубу Нигердаги исёнчилар музокарага рози бўлмаган тақдирда, “қўшинларни шай ҳолатга келтириш ва Нигердаги вазиятга ҳарбий аралашув”ни ёқлади.
Исёнчиларга ультиматум
ECOWAS давлатлари 30 июль куни Нигердаги қўзғолончиларга ультиматум қўйиб, конституциявий тузумни бир ҳафта ичида тиклашни талаб қилганди. Талаб рад этилган тақдирда улар турли чоралар, жумладан куч ишлатиш билан таҳдид қилган.
ECOWAS илгари ҳам бир нечта қуролли можароларга аралашган эди. 1990 йилларда улар Серра-Леоне, Либерия ва Гвинея-Бисауда, 2002 йилда Кот-д’Ивуардаги давлат тўнтариши муносабати билан бошланган фуқаролар урушини ҳал қилишда ўз қўшинларидан фойдаланган.
Нигер ҳарбий хунтаси ECOWAS таҳдидлари фонида Қуролли кучларда муҳим кадрлар алмашинувини амалга оширди. Қуруқликдаги кучлар ва авиациядаги муҳим лавозимларга ишончли шахсларни тайинлади.
Изоҳ (0)