Польша Беларусь билан чегарани ўн минг аскар билан мустаҳкамлайди. Бу ҳақда мамлакат мудофаа вазири Мариуш Блашакка таяниб, Rzeczpospolita хабар берди.
“10 мингга яқин аскар бўлади — 4 минг нафар ҳарбий хизматчи чегарани қўллаб-қувватлаш бўйича операцияда бевосита иштирок этади, 6 минг нафари эса захирадан”, — дея тушунтирди Мудофаа вазирлиги раҳбари.
Блашакнинг таъкидлашича, улар мамлакат шарқидаги гарнизонларда малака ошираётган аскарлар бўлади. Вазир икки йил ичида Польша армияни кучайтириш жараёни давом этса, Европадаги энг кучли қуруқлик армиясига эга бўлишини ҳам таъкидлади.
Польша нега Беларусь билан чегарасини мустаҳкамламоқда?
Польша “Вагнер” ёлланма аскарларининг Беларусга кўчиб келиши ва Беларуснинг иккита ҳарбий вертолёти Польша ҳаво ҳудудини бузиши сабабли чегарани қўриқлашни кучайтирди. Бундан ташқари Беларусдан ноқонуний мигрантлар оқими ҳам вазиятни назоратга олишни талаб қилди.
“Вагнер” Беларусда
23-24 июнь кунлари Россияда “Вагнер” хусусий ҳарбий кампанияси раҳбари Евгений Пригожин томонидан исён кўтаришга уриниш бўлди. У “Адолат марши”ни бошлаганини, унинг мақсади Москвага етиб бориш эканини айтди.
Қўзғолон пайтида Ростов-Дон ва Воронеж қўлга олинди, бир нечта вертолётлар ва ҳарбий самолётлар уриб туширилди, оқибатда камида ўн нафар рус ҳарбийси ўлди.
Путин Пригожинни давлатга хиёнатда айблади. Бироқ Беларусь раҳбари Александр Лукашенко билан музокаралардан сўнг Пригожин ўз жангариларининг Москвага юришини тўхтатди. “Вагнер” Беларусга кетадиган бўлди ва ҳозир Беларусда фаолият олиб бормоқда.
Беларусдан келаётган таҳдид жиддий бўлиб, “вагнерчилар” Беларусь орқали Польша ҳудудига киришга ҳаракат қилишгани айтилган.
Беларусь ҳарбий самолётлари Польша ҳаво ҳудудини бузди
1 август куни Беларуснинг иккита вертолёти Польша ҳаво ҳудудини бузди. Вертолётлар машғулотлар ўтказган ва бу ҳақда Польша олдиндан хабардор қилган.
Ҳаво ҳудуди бузилгач, Польша НАТОни хабардор қилган. Польша Ташқи ишлар вазирлиги нима бўлганини тушунтириш учун Беларусь бўйича муваққат ишлар вакилини чақиртирган.
Ноқонуний миграция
Польша Чегара хизмати раҳбари Томаш Прагага кўра, 2023 йилда Польша-Беларусь чегарасини 19 минг киши ноқонуний кесиб ўтишга уринган бўлса, 2022 йили бу кўрсаткич 16 минг кишини ташкил этган. Польша Беларусь билан чегарада электрон ҳимоя билан жиҳозланган тўсиқ ўрнатган.
Изоҳ (0)