Нигерда давлат тўнтариши уюштирган ҳарбийлар Ғарбий Африка мамлакатлари иқтисодий ҳамжамияти (ECOWAS), БМТ ва Африка Иттифоқи делегацияларини мамлакатга киритмади. Бу ҳақда ҳамжамият веб-сайтидаги хабарда айтилади.
“Кечқурун Нигер ҳарбий маъмуриятидан улар уч томонлама делегацияни қабул қилишга тайёр эмаслиги ҳақидаги хабар олинганидан кейин миссия тўхтатилди”, — дейилади ECOWAS баёнотида.
Шу билан бирга, ташкилот мамлакатда конституциявий тузумни тиклаш бўйича чора-тадбирларни давом эттириш ниятида.
Аввалроқ АҚШ Давлат котиби ўринбосари Виктория Нуланд Нигерга сафар қилганди. Нуланд хунтани, агар мамлакатда қонуний ҳукумат тикланмаса, АҚШ Нигерга ҳар қандай ёрдамни тўхтатиши ҳақида огоҳлантирган. У исёнчиларга конституциявий тузумни тиклашда Американинг ёрдамини ҳам таклиф қилган.
Ҳарбийлар Нуландга ҳибсдаги Нигер президенти Муҳаммад Базум билан учрашишга рухсат бермаган.
Нигердаги ҳарбий исён ва ECOWAS қўйган ультиматум
Нигерда ҳарбий тўнтариш 26 июль куни содир бўлди. Ўшанда хунта вакиллари республика президенти Муҳаммад Базумни ҳокимиятдан четлатганини маълум қилди. Икки кундан сўнг президент гвардияси бошлиғи генерал Абдураҳмон Чиани ўзини янги давлат раҳбари деб эълон қилди.
ECOWAS давлатлари Нигердаги ҳарбийларга ультиматум қўйиб, мамлакатдаги қонуний ҳокимиятни жойига қайтариш учун бир ҳафта вақт берди. Муддат 6 августда тугади, бироқ иттифоқ аъзолари огоҳлантирган чора кўрилмади — Нигерга бостириб кирилмади. The Wall Street Journal газетаси ECOWAS давлатларидан бирининг юқори мартабали ҳарбий зобитига таяниб, минтақа қуролли кучлари ҳали аралашувга тайёр эмаслиги ва тайёргарлик учун кўпроқ вақт кераклигини ёзди.
ECOWAS — Ғарбий Африкадаги 15 та давлатнинг минтақавий иттифоқи. Унга Бенин, Гамбия, Гана, Гвинея-Бисау, Кот-дъИвуар, Кабо-Верде, Либерия, Нигер, Нигерия, Сенегал, Серра-Леоне, Того, Буркина-Фасо, Гвинея ва Мали киради (охирги учта мамлакатнинг иттифоққа аъзолиги ҳарбий тўнтаришлардан кейин тўхтатиб қўйилган).
Нигер ҳарбий хунтаси ECOWAS таҳдидлари фонида Қуролли кучларда муҳим кадрлар алмашинувини амалга оширди. Қуруқликдаги кучлар ва авиациядаги муҳим лавозимларга ишончли шахсларни тайинлади. Улар эҳтимолий босқинга тайёрланиш учун пойтахт Ниамейга кўчиб ўтди, Нигер осмонини ёпди.
Изоҳ (0)