Қашқадарёдаги мактаб ўқитувчилар ва халқ пулига таъмирланяпти дейилди. Мактаб раҳбарияти ва аҳоли буни рад этди

“Дарё”га Қашқадарё вилоятининг Кўкдала туманидаги 53-сонли умумтаълим мактаби таъмири ўқитувчилар ҳамда маҳалла аҳли томонидан амалга оширилаётгани, мактаб таъмири учун ажратилган маблағ масъуллар томонидан “еб кетилаётгани” айтилган хабар келиб тушди. 

“Дарё” мухбири воқеа жойига етиб борганида, мактабда ҳақиқатан ҳам таъмирлаш ишлари кетаётгани маълум бўлди. Таъмирлаш ишларини амалга ошираётганларга кўра, улар қурилиш фирмаси ишчилари.

Мактаб директори Умар Ҳайитовнинг айтишича, мактаб биносининг таъмири учун мактаб ўқитувчилари ва аҳолидан ҳеч қандай маблағ йиғилмаган. Таъмирлаш ишлари давлат маблағлари асосида амалга оширилмоқда.

Бугунги кунда давлат раҳбари таълимга жуда катта эътибор қаратмоқда. Шу боис туман ҳокими ташаббуси билан бизнинг мактабимизда ҳам қурилиш-таъмирлаш ишлари бошлаб юборилди. Биз ҳам қўл қовуштириб ўтирмасдан мана шу ташаббусга ҳамоҳанг тарзда эски пахса деворини бузиб, ўрнига панжара ўрнатишга қарор қилдик. Ташаббусимиз маҳалла аҳолиси ҳамда шу даргоҳни тугатган собиқ ўқувчилар томонидан қўллаб-қувватланди. Лекин ҳеч ким мажбурланмаган. Ўзимиз ташаббус қилдик ва ишларни ўзимиз амалга оширяпмиз, — дейди мактаб директори Умар Ҳайитов.

Мазкур мурожаат юзасидан маҳалла аҳли билан ҳам суҳбатлашдик.

Олдин бу бино болалар боғчаси эди. Сўнгра мактабга айлантирилди. У даврларда мактабларга унча эътибор берилмас эди. 33 йилдан бери жорий таъмирланмаган мактаб таъмири учун ҳоким маблағ ажратишини эшитиб, бу гаплардан тўлқинланиб, ташаббус қилишга қарор қилдик. Мактаб ҳовлиси эски пахса девор билан ўралган эди. Ана шу деворни бузиб, ҳашар йўли билан қайта қуришни маҳалладагилар тўлиқ қўллаб-қувватлади. Кимдир шу савобли ишга қўлим тегсин деб қурилишга ёрдам берса, кимдир қурувчиларга тушлик олиб келди, — дейди биз билан суҳбатда бўлган маҳалла нуронийси Эшмурод Оролов.

Кўкдала туман ҳокимлиги ахборот хизмати раҳбарининг маълумот беришича, 53-мактаб таъмири учун 569 миллион сўм пул маблағ ажратилган.

Қурилиш ишлари “Фаршер янги қурилиш” масъулияти чекланган жамияти томонидан амалга оширилмоқда. 2023 йилда тумандаги мактаблар таъмири учун жами 840 миллион сўм пул маблағи ажратилган, — дейди ҳокимлик ахборот хизмати раҳбари.

Қашқадарё вилоят мактабгача ва мактаб таълими бошқармасининг қурилиш масалалари бўйича масъули Алламурод Бойтўраевнинг “Дарё”га қўшимча қилишича, янги ўқув йилига тайёргарлик доирасида жорий йил вилоятдаги мактабларнинг 39 тасини мукаммал таъмирлаш учун республика бюджетидан 125 миллиард 200 миллион сўм маблағ ажратилган. Шунингдек, 25 та мактабни таъмирлаш учун яна қўшимча тарзда вазирлик ташаббуси билан яна 67 миллиард 700 миллион сўм маблағ йўналтирилган. “Ташаббусли бюджет” бўйича таъмирланаётган 62 мактаб учун яна 63 миллиард 800 миллион сўм маблағ берилган.