Сергели тумани ҳокимлиги ёмғир ёққан вақтда асфальт қилинган кўча бўйича маълумот берди.
Ижтимоий тармоқларда Сергели тумани “Қурувчилар” маҳалласи марказий кўчасида ёмғир ёғиб турган пайтда асфальтлаш ишлари олиб борилгани ҳақида хабарлар тарқалди. Қайд этилишича, ушбу воқеадан сўнг, туман ҳокимлиги ходимлари томонидан мазкур ҳудудга чиқиб, жараён тўхтатилган ва ёмғир тингандан сўнг асфальтлаштириш ишлари қайта амалга оширилган.
“Мазкур ҳолат бўйича хатога йўл қўйиб, ноқулай об-ҳаво шароитида қилинган асфальт учун қурувчи ташкилотга маблағ тўлаб берилмаслигини маълум қиламиз”, — дейилади хабарда.
Февраль ойида Техник жиҳатдан тартибга солиш агентлиги вакили Ўзбекистондаги йўлларнинг сифати ҳақида фикр билдириб, нима сабабдан уларда чуқурлар, ёриқлар, нотекисликлар кўплигига изоҳ берганди. Маълумотларга кўра, Ўзбекистон ҳудудида 98 турдаги асфальт-бетон маҳсулотларини ишлаб чиқарувчи корхоналар бор. Бу корхоналарнинг 70 фоизи стандартларга жавоб бермайди.
Апрелда эса Фарғонада асфальт хариди бўйича ўтказилган салкам 3,5 миллиард сўмлик тендер бекор қилинганди.
Изоҳ (0)