Дубайдаги Ироқ самолётидан айиқ қочиб кетди (видео)

Дубайда Ироқ самолётининг юк бўлимидаги қафасдан айиқ қочиб кетди. Бу ҳақда Аl Arabia хабар берди. 

Мазкур ҳодиса парвознинг кечикишига сабаб бўлиб, йўловчиларни ғазаблантирган. Ироқ бош вазири воқеа юзасидан текширув ўтказишни буюрган.

Ироқ ҳаво йўллари айиқнинг қочиб кетишида авиаташувчи айбдор эмаслигини маълум қилган. Экипаж БАА расмийлари билан ҳамкорлик қилгани, улар айиқни ухлатиб, уни самолётдан чиқариш учун мутахассислар юборганини билдирган. Борт капитани рейснинг кечикиши учун йўловчилардан узр сўраган. 

“Айиқ Халқаро ҳаво транспорти ассоциацияси стандартларига мувофиқ қонуний равишда ташилган”, — дейди авиакомпания.

Айиқ Ироқ пойтахтига олиб борилиши керак эди, унинг эгаси ҳақида маълумот берилмаган. 

Бағдодда йиртқич ёввойи ҳайвонларни сақлаш бадавлат одамлар орасида жуда машҳур бўлиб кетган. Шу билан бирга, Ироқ расмийлари ёввойи ҳайвонларни ҳимоя қилиш бўйича қонуний қоидаларни қўллашга интилмоқда.