Хитойда ҳайвонот боғи айиқлар кийимидаги махсус одамлардан фойдаланганликда айбланмоқда. Интернетда қора малай айиғи орқа оёқларида турган видео пайдо бўлганидан кейин блогерлар шундай тахминга келишди.
Видео кеча, 31 июль куни ижтимоий тармоқларда эълон қилинди. Кадрлар Хитойнинг Чжестян провинциясидаги Ханчжоу ҳайвонот боғида суратга олинган. Изоҳларда фойдаланувчилар айиқнинг оёқлари ҳаддан ташқари ингичка эканлигига эътибор қаратишган. Шундан сўнг бу ҳайвоннинг оёғи эмас, балки унинг терисини ёпиниб олган муассаса ходими эканлиги тахмин қилинди.
Муассаса маъмурияти барча айбловларни қатъиян рад этди. Ҳайвонот боғи вакилининг сўзларига кўра, бундай алмаштиришнинг иложи йўқ, чунки 40 даража иссиқда одам мўйнали кийимда узоқ тура олмайди.
Бундан ташқари, айиқ орқа оёқларида турганда бўйи 1,3 метрдан ошмайди, одамнинг ўртача баландлиги эса тахминан 170 сантиметрни ташкил қилади.
Ҳайвонот боғи вакиллари оммавий ахборот воситалари ходимларини ҳайвонот боғига шахсан ташриф буюришга ва айиқларнинг ҳақиқий эканлигига ишонч ҳосил қилишга таклиф қилди, деб хабар беради AP.
Малай айиғи табиатда Борнео, Жава, Суматра, шунингдек, Малай ярим оролида яшайди. Тоғ ва пасттекисликлар, тропик ва субтропик ўрмонларда яшайди. Бу айиқларнинг энг кичиги ва энг тажовузкори ҳисобланади.
Изоҳ (0)