Айни вақтда бош вазир Абдулла Арипов Тошкент шаҳрида Aziya Invest Favorit МЧЖ томонидан қурилаётган кўп қаватли уй-жойлардаги хонадонларнинг фуқароларга сотилиши юзасидан келиб чиққан низоли вазият қатнашчилари билан учрашув ўтказаётгани тўғрисида хабар берилганди. “Дарё” мухбирининг Тошкент шаҳар прокурорига таяниб маълум қилишича, мазкур МЧЖ раҳбарига нисбатан уй қамоғи қўлланилган.
Тошкент шаҳар прокурори Эркин Йўлдошевнинг сўзларига кўра, аввалбошидан мазкур ҳолат фирибгарлик билан бошланган. Aziya Invest Favorit МЧЖнинг 34 фоизига эгалик қилган Хайрулла Ҳатамов 14 маротаба судланган. Бу иқтисодий судларда кўриб чиқилган.
“Унга уй қамоғи эҳтиёт чораси қўлланилди. Унга ва оила аъзоларига тегишли бўлган 200 миллиард сўмлик мулклари хатланди”, — дейди прокурор.
Таъкидланишича, у “Ўзсувтаъминот”га тегишли бўлган ерда ноқонуний қурилиш ишларини амалга оширмоқчи бўлган. Уй қуриш учун Тошкент шаҳар ҳокимининг қарори бўлмаган.
“Уй олиш учун 1 106 нафар фуқаро шартнома тузиб алданган. Айрим ҳолатларда 1 та хонадан 2 нафар шахсга сотилган. Шунингдек, хонадонлар банкка гаровга қўйиб юборилган. Тергов жараёнида 2 минг нафардан ортиқ фуқаро билан суҳбат ўтказилди. Тергов ишлари давом этмоқда”, — дея қайд этади Тошкент прокурори.
Изоҳ (0)