Бош вазир Абдулла Арипов Тошкент шаҳрида Aziya Invest Favorit МЧЖ томонидан қурилаётган кўп қаватли уй-жойлардаги хонадонларнинг фуқароларга сотилиши юзасидан келиб чиққан низоли вазият қатнашчилари билан учрашув ўтказаётгани тўғрисида хабар берилганди. “Дарё” мухбирига кўра, учрашувда Қурилиш вазирлиги масъули мазкур кўп қаватли уйлар учун қаердан жой ажратилишини маълум қилган.
Қурилиш ва уй-жой коммунал хўжалиги вазири ўринбосари Даврон Одиловга кўра, Aziya Invest Favorit Яшнобод туманида қуришни ваъда қилган кўп қаватли уйларни Тошкент шаҳар Бектемир туманидаги Ийик ота массивидан жой ажратиш таклиф этилмоқда. Мазкур ҳудуд метродан 3,6 километр узоқликда жойлашган.
Ажратилган ҳудудда қурилиш ишларини бажариш учун учта қурилиш фирмаси танлаб олинган. Уларга 1 метр квадрат хонадон майдони учун 7 миллион, 6 миллион 900 минг ва 6 миллон 800 минг сўмдан таклифлар берилган.
Бош вазир Абдулла Ариповнинг қўшимча қилишича, нархлар яна пасайтирилади.
“Хонадонларни қуриш муддати 2024 йилнинг охиригача тугатилишига кафолат берамиз. Қурувчи ташкилотлар Республикадаги энг яхши қурилиш ташкилотларининг 10 талигига киради. Қурилиш ишларини1 сентябрдан бошлаш режалаштирилмоқда”, — деди бош вазир.
Учрашувда мурожаатчи фуқаролар комиссия танлаган ҳудуд шаҳардан анча узоқлигини айтмоқда.
Бундан олдин Aziya Invest Favorit МЧЖнинг 34 фоизига эгалик қилган Хайрулла Ҳатамовга нисбатан уй қамоғи эҳтиёт чораси қўлланилгани тўғрисида хабар берилганди. Унга ва оила аъзоларига тегишли бўлган 200 миллиард сўмлик мулклари хатланган.
Изоҳ (0)