Статистика агентлиги январь–июнь ойларида аҳолининг умумий даромадлари акс этган ҳисоботни эълон қилди. Аҳоли даромадлари таркибида нафақа ва моддий ёрдамлар учун ажратилган маблағлар ҳам бор.
Январь–июнь ойларида аҳолининг умумий даромадлари 338,4 триллион сўмни ташкил этган. Шундан 28,5 фоизи трансфертлар улушига тўғри келади. Пенсия ва нафақалар учун ажратиладиган маблағлар ҳам трансфертлар таркибидан ўрин олган.
Трансфертлар – уй хўжаликларига бошқа уй хўжаликларидан, давлат томонидан, юридик шахслардан, чет элдан келиб тушадиган ҳамда келгусида қайтарилиши шарт бўлмаган товарлар, хизматлар ва активлардир.
Ижтимоий трансфертлар таркибида пенсиялар энг кўп улуш 74,1 фоизни, ташкил қилган бўлса, нафақалар 24 фоизни, стипендиялар 1,9 фоизни ташкил этди. 2022 йилнинг мос даври маълумотлари билан таққослаганда пенсияларнинг ўсиш суръати 21,4 фоизни, нафақалар 6 фоизни, стипендиялар ўсиш суръати 20,9 фоизни ташкил этди.
Ярим йилликда аҳолини ижтимоий қўллаб-қувватлаш мақсадида жами 9 триллион сўмлик нафақа ва моддий ёрдамлар ажратилди. Мазкур маблағларнинг 32,6 фоизи бюджетдан ташқари Пенсия жамғармаси ҳисобидан молиялаштириладиган давлат ижтимоий суғуртаси бўйича нафақалар ҳисобланади. Қолган 67,4 фоизи эса республика ва маҳаллий бюджет маблағлари ҳисобидан молиялаштирилган.
Изоҳ (1)
пенсиялар 21.4 стипендиялар 20.9 процентга ошганини тушунмадик