Бугун, 4 август куни Сенатнинг навбатдаги ялпи мажлиси иш бошлади. Мажлис аввалида сенаторларнинг жойлардаги муаммоли масалалар тўғрисидаги фикрлари эшитилди.
Фото: “Дарё” / Мадина Нурман
Сенатор Одилжон Эминовнинг айтишича, Андижон вилояти Булоқбоши туман тиббиёт бирлашмаси ўрганилганда, бино ва ундаги ускуналар манан эскиргани аниқланган.
“У ердаги жарроҳлик, тез тиббий ёрдам ва реанимация бўлимлари таъмирталаб ҳолатда эканига гувоҳ бўлдик. Бирлашмада 7 та бўлим фаолият юритмоқда. Бино СССР даврида, 1962 йили қурилган. Бирлашмада ўша даврда ҳам, ҳозир ҳам операциялар қилиб келинади. Бироқ аксарият ускуналар Совет пайтидан қолган. Бино аянчли ҳолатда— дераза-ромлари қор-ёмғир таъсирида ойнани ушламайдиган даражага келган. Ваҳолангки, ичкарида операциялар ўтказилади. Бино учун маҳаллий бюджетдан 300 миллион сўм пул ажратилган. Лекин у пулга қилинган ишлар енгил-елпи. Уларни балки қилгандан қилмаган маъқул бўларди. Чунки зах босиб, моғорлаб кетган деворлар устини пластик билан ёпиб қўйилган. Пластик орқасида инфекция ва вируслар яшашига шароит яратилган”, — деди сенатор.
Ўрганишларга кўра, вилоят ҳокими томонидан 2022 йилда 22 миллиард сўмлик умумий тиббиёт копмлексини янгилаш, жорий ва капитал таъмирлаш бўйича “заявка” берилган.
“Лекин Соғлиқни сақлаш вазирлиги ва бошқа ташкилотлар бу масалани кўриб чиқмаган. Шунинг учун биз Соғлиқни сақлаш вазирлиги, Иқтисодиёт вазирлиги, Андижон вилоят ҳокимлиги 2024 йилга мўлжалланган манзилли дастурга мана шу объектни киритишини сўраймиз”, — деди сенатор.
Мазкур масала юзасидан муносабат билдираркан, Соғлиқни сақлаш вазири ўринбосари Отабек Фозилкаримов бино келаси йилги инвестиция дастурига киритилишини айтди.
“Сенаторимиз айтганларидек, Булоқбошидаги тиббиёт бирлашмасига қарашли юқумли касалликлар ва шошилинч тиббий ёрдам кўрсатиш бўлимлари ҳақиқатан ҳам аянчли аҳволда экани маълум бўлди. Вазиятни ўрганган сенаторларимиз таклифлар берди. Ва шу асосда 2024 йилги давлат инвестиция дастурида тез тиббий ёрдам бўлимини қайтадан қуриш белгиланмоқда. Айтилганидек, бинода бир неча йиллар давомида таъмирлаш ишлари қилинган. Лекин натижа бўлмаган. Чунки бинонинг ўзи жуда ҳам эски. Шунинг учун қайта қуриш бўйича 13,5 миллиард сўмлик лойиҳа-смета ҳужжатлари ишлаб чиқилиб, 2024 йилги инвестиция дастурига киритилмоқда. Шунингдек, юқумли касалликлар бўлими учун 8,5 миллиард сўмлик лойиҳа-смета ҳужжатлари тайёрланади. Бу ҳам 2024 йилги инвестиция дастурига киритилади. Ҳозир лойиҳалар Иқтисодиёт ва молия вазирлиги билан кўриб чиқилмоқда”, — деди у.
Сенат раиси Танзила Норбоева бу масала доимий назорат қилинишини айтди ва 10 кун ичида парламент юқори палатасига аниқ ечимларни назарда тутувчи чора-тадбирлар киритилиши кераклигини таъкидлади.
Изоҳ (0)