Украинанинг Россияга зарба бериш учун ўз ҳарбий-саноат мажмуаси томонидан ишлаб чиқилган қуролларидан фойдаланишига ҳеч қандай тақиқ йўқ. Бу ҳақда Украина Миллий хавфсизлик ва мудофаа кенгаш котиби Алексей Данилов маълум қилди.
Даниловга кўра, Украина Россияга зарбалар бериш учун иттифоқчилар берган қуроллардан фойдаланмасликка ваъда берган.
“Биз ҳамкорлар билан Россияга қарши урушда иштирок этганликда айбланмасликлари учун уларнинг қуролларини Россияга зарбалар беришда ишлатмаслик тўғрисида келишувга эришдик, аммо бу маҳаллий ишлаб чиқарадиган қуролларга тааллуқли эмас”, — деди у.
Миллий хавфсизлик ва мудофаа кенгаши котибининг қўшимча қилишича, қуроллар сифати бўйича ютуқлар бор.
“Украина дронлари нафақат ҳаракатланиши, балки тегишли шаҳарда, тегишли вақтда бўлиши ва вақти-вақти билан қилиши керак бўлган ишни бажаради”, — деди Данилов.
Москвага дронлар ҳужуми: вазият қандай?
1 августга ўтар кечаси Москвага яна дронлар ҳужум қилди. Улардан иккитаси шаҳарга яқинлашганида ҳаво мудофааси томонидан уриб туширилди. Учинчиси аввалги ҳужумда шикастланган “Москва Сити” бизнес марказидаги бинога келиб урилди.
Аввалги ҳужум 30 июлга ўтар кечаси юз берганди. Жумладан, Москвага учта дрон учирилган, иккитаси “Москва Сити” бизнес марказидаги биноларга келиб тушган. Дронларнинг яна бири Москва вилоятининг Одинсово туманида уриб туширилгани айтилган.
Бундан ташқари, 24 июль куни ҳам дрон ҳужуми бўлганди. Ўшанда Москвадаги нотурар жой бинолар зарар кўрган. Улардан бири Россия Мудофаа вазирлиги яқинида қулаган.
Май ойи охири ва июль бошида эса дронлар Россия пойтахтига яқинлашганда уриб туширилган. БМТ сўнгги дрон ҳужумини қоралаб, фуқаролик объектларига ҳужум қилмасликка чақирган.
Изоҳ (0)