Африкалик Помпадур хоним: соч турмаги ва ёрқин либослари сабаб энг кўп кўзга ташланадиган биринчи хонимнинг гардероби қандай кўринишга эга?

Шантал Бийя ҳақли равишда дунёдаги энг ёрқин биринчи хонимлардан бири ҳисобланади. Буларнинг барчаси аёлнинг унутилмас либослари, ўзига хос помпадур услубидаги соч турмаги, ихчамлик ва камтарликни аниқ рад этиши туфайли Шанталнинг образлари барчани ўзига қаратади. Камеруннинг биринчи хоними шу қадар машҳурки, мода кузатувчилари айрим кийимларни “Шантал Бийя услуби” деб аташади.

Шантал Вигурунинг келиб чиқиши ярим француз. У ёлғиз она Розетта Ндонго-Мбучуангнинг ягона фарзанди бўлиб, француз отаси Société Forestier et Industriellе de Belabo'нинг собиқ ходими Жорж Вигуру билан ҳеч қачон учрашмаган. Қиз модел бўлиб, Яунде ва Дуаладаги маҳаллий мода кўргазмаларида қатнашган, коллежда ўқиб юрганида Дуаладаги ресторанда официант бўлиб ҳам ишлаган.

Шантал Пол Бийяга 1994 йилда турмушга чиқади. Тахминларга кўра, уларнинг романтикаси 1993 йилда давлат раҳбарининг Мвомекаа қишлоғидаги туғилган куни кечасида бошланган. Ўша пайтда қиз 22 ёшда бўлган, айтишларича, президент қизнинг қувноқ характерини ёқтириб қолган. Аммо Шантал такси ҳайдовчисига турмушга чиққан бўлиб, кейинчалик бу никоҳидан ажрашади. 1994 йил 23 апрелда бўлиб ўтган Шантал ва Пол Бийянинг тўйига саноқли одам таклиф қилинган, чунки бу никоҳ бошқалардан сир сақланган.

Ҳозирда Пол 89, Шантал эса 51 ёшда. Бийя 1982 йилдан бери узоқ вақт хизмат қилган замонавий президентлардан бири сифатида танилган. Камерун Марказий Африкада жойлашган, аммо Атлантика океанига чиқиш имконига эга. Маҳаллий аҳоли эса француз ва инглиз тилларида гаплашади. Мамлакатнинг урф-одатлари Африкадаги турли этник гуруҳлардан келиб чиққан ва мустамлакачиликдан кейинги баъзи элементлар билан ўзаро боғланган.

Кўплаб африкаликлар сингари Шантал ҳам иложи борича ёрқин либос кийишга ҳаракат қилади. Кўпинча бу тор этакли узун юбка ва турли рангдаги жакет бўлади. Камеруннинг биринчи хоними дипломатик ташрифлар пайтида эрига ҳамроҳлик қилади, унинг либослари доимо оломондан ажралиб туради. У ҳар доим ёрқин рангларни танлайди, шунинг учун сиёсий учрашувлардаги суратларда уни сезмаслик мумкин эмас.

Бироқ Бийя ўзини миллий анъаналар билан чекламайди. Камеруннинг биринчи хоними Chanel, Dior, Gucci ва Louis Vuitton каби машҳур ғарб брендларини ҳам яхши кўради. Кўпинча ушбу брендлар сумкаларини ҳар доим ёрқин бўлган кийимлари билан бирлаштиради.

Шантал образининг диққатни тортадиган элементи унинг соч турмагидир. Помпадур услубидаги ғайриоддий соч турмаги юзга тушган калта жингалаклар ва ортга ташланган узун сочлар баъзан ажойиб каре билан алмаштирилади, лекин иккита хусусият ҳар доим ўзгаришсиз қолади — сочларнинг ажойиб дабдабаси ва жозибали ранг.

Камерун биринчи хонимининг унутилмас соч турмаги кўпинча бош кийимлар билан ҳам тўлдирилади. Бу Рим папаси Бенедикт XVI билан учрашувдаги хоч шаклидаги ғайриоддий шляпа бўлиши мумкин. Пушти пион гулдастаси эса Бийя хоним томонидан Обама жуфтлиги билан учрашув учун танланган.

Камерун Ҳамдўстлик давлатларининг бир қисми, шунинг учун Бийя жуфтлиги қирол оиласи билан тез-тез учрашади. Виндзорлар оиласининг кўплаб аёллари сингари Шантал ҳам монорангда образ яратишни яхши кўради. Баъзида уйғунлик шундай даражага етиши мумкинки, тўқилган гулли брош Dior сумкаси рангига тўлиқ мос келади. Биринчи хоним ҳар доим сайлов участкаларига сариқ либосда келади.

Бироқ Шанталнинг севимли рангини аниқлаш осон эмас. Барча ранглар унга ярашади ва Бийя ҳар доим жозибали кийимларни ёрқин макияж билан тўлдиради, бу эса образни меъёрида сақлашга ёрдам беради. Биринчи хонимнинг гўзаллик арсеналида жуда кўп пушти ва қизил лаб бўёғи, ажойиб румяна палитраси ва хайлайтерлар мавжуд. Шанталнинг ранг-баранг маникюрни яхши кўришини ҳам сезмаслик мумкин эмас.

Камерун биринчи хонимининг деярли ҳар қандай кийими баланд пошнали пойабзал лар билан тўлдирилади. Бийя хоним катта аксессуарлар — ҳалқали сирғалар, узуклар, соат билагузукларни ҳам қадрлайди. Мода кузатувчилари бир овоздан Шантални сиёсий арбобдан кўра кўпроқ кийиниши билан машҳур аёл деб таснифлашлари ажабланарли эмас.