Ўзбекистонлик ёш режиссёр Гулнара Иванова машҳур ёзувчи Стивен Кингнинг Dollar Baby номли лойиҳасида ғолиб бўлиб, унинг асарини экранлаштириш ҳуқуқини 1 долларга сотиб олгани ҳақида хабар бергандик. “Дарё” мухбири Наргизахон Муродова ёш режиссёр билан суҳбатда бўлиб, унинг фаолияти билан яқиндан танишди.
— Фамилиямдан сезган бўлсангиз керак, оилам татар ва ўзбек инсонларидан ташкил топган. Ота-онам муҳандис, оиламиз ўртаҳол ҳаёт кечиради. Болалигимдан кино санъатига қизиққанман. Бу соҳани ўрганиш учун бор вақтим ва меҳримни сарфлаганман. Ҳамиша фильмларда ўзимнинг инновацион ғояларимни синаб кўришга ҳаракат қилганман. Аммо натижалар ҳар доим ҳам кутилганидек бўлмайди. Бундай дейишимнинг боиси, 2019 йили режиссёр Шокир Ҳолиқовнинг “Чой” фильми Канн халқаро кинофестивалида ўрин олгани ҳақида барча оммавий ахборот воситаларида хабар берилганди. Ўшанда Шокирга сервис берилгани оммавий ахборот воситаларининг эътиборини тортган эди. Ўша йили менинг ҳам фильмим Каннда қатнашиб, мукофот олган бўлса-да, бу ҳақида ҳеч ким ёзмади. “Чой” фильми ҳам Грант-При олган, аммо менинг ишим Best Storytelling йўналишида ғолиб бўлган эди, — дейди Гулнара Иванова.
Ёш режиссёр Стивен Кинг лойиҳасида қандай иштирок этгани ва ғолибликни қўлга киритиш жараёнлари қандай кечгани ҳақида сўзлаб берди.
— One Baby Dollar дастури 1970 йилдан буён амалга оширилади. Стивен Кинг ёш киноижодкорларни қўллаб-қувватлаб, уларга ёрдам беради. Анчадан буён бу дастурга киришни режа қилиб юрардим. Унда иштирок этиш жуда оддий, ҳикояни танлашингиздан мақсад нима ва уни экранга қандай олиб чиқмоқчи эканлигингиз ҳақида ёзиб юборасиз. Агар ғояларингиз унга маъқул келса, сиз билан боғланади, жавоб бермаса демак дастурга қабул қилинмаган бўласиз. Мен Стивен Кингга нима учун унинг ҳикоясини танлаганим ҳақида узундан узоқ хат ёзиб юбордим. Менга жавоб беришди. Унинг ўзи алоқага чиққанидан ва ғояларим унга маъқул келганидан жуда қувондим, — дейди Гулнара Иванова.
Ижодкор ўзи суратга олаётган янги фильм ҳақида ҳам сўзлаб берди.
— Айни пайтда ВГИКнинг Тошкентдаги филиалида таҳсил оламан. Бу ер худди иккинчи уйимдек бўлиб қолган. Бу ер ёшларни қўллаб-қувватлайдиган базага ўхшайди. Мен ўзбек киносида инқилобий ўзгариш қилишни ва уни жаҳон миқёсида ҳам олқишлар билан қарши олишларини истайман. Аммо бу борада институтдан ташқари, кимдан ёрдам олишни ва кимга мурожаат қилишни билмаяпман. Ўзбекистонда амалга оширмоқчи бўлган ғояларим бисёр, лекин уларни қандай амалга оширишни билмайман.
Айни кунларда “Кўзингни оч” номли тўлиқ метражли фильм устида ишлаяпман. Бу шу кунгача суратга олган энг узун картиналаримдан биринчиси ҳисобланади. Ростини айтиш керак, бу ўзбек киносидаги анъанавий бўлмаган, мутлақо янги жанрдаги фильм ҳисобланади. Шунинг учун ҳам уни суратга олишимга аранг рухсат беришди. Фильм ҳаммага бирдек тушунарли бўлмаслиги мумкин, аммо бу у ёмон фильм дегани эмас. Назаримда фильм шаблонларга бўйсунмаслиги, ижодкор эса эркин ижод қилиши керак. Бу фильмни бюджетсиз, фақат дўстларим ёрдамида суратга оляпман. Ва албатта, ВГИК институтининг Тошкентдаги филиали, Spectre Studio кинокомпанияси ва Ўзбекистон Давлат фильм жамғармаси ҳам ёрдам берди, — дейди режиссёр.
Гулнара Иванова ўзбек киносининг бугунги аҳволи ва фильм суратга олишда қандай муаммоларга учраётгани ҳақида ҳам гапириб берди.
— “Ўзбек киноси ўлди” деган гап тез-тез қулоққа чалинади. Менимча, ҳозир ўзбек киносининг қайта тирилиш даври. Яъни ҳаммаси зўр эмас, аммо шу ерда ҳам нимадир қилишга уринаётган инсонлар бор. Муҳими, умидсизликка тушмаслик ва ҳаракатни сусайтирмаслик керак. Мен замонамизнинг энг буюк ёзувчиларидан бири, Стивен Кингнинг ўзига хат ёзишга ҳаракат қилдим ва бу натижа берди. Мен “қўрқинчли фильмлар қироли” танлаган биринчи ўзбек аёли бўлганимдан қувонаман.
Чўнтагимда бир тийин бўлмаса-да, бадиий фильм суратга олишга қарор қилдим. Агар суратга олиш ишларини бошласам, бир ҳафтадан кейин продюсерлар ёрдам беришади, деб умид қилгандим. Сир эмас, фильм суратга олиш учун қаерларгадир хат чиқариш, рухсатнома олиш каби қоғозбозлик муаммоларини ҳал қилишда ВГИКнинг Тошкентдаги филиал директори Элдор Содиқович ёрдам берди. Санъат учун ёрдам бериш учун келган барча талаба дўстларимга ҳам ўз миннатдорлигимни билдираман. Бу гапларни бежизга айтаётганим йўқ. “Кўз қўрқоқ, қўл ботир” дейишганидек, меҳнат ва ишонч ҳамма қўрқувни саробга айлантиради.
Бир неча ой аввал Ўзбек кинематография агентлигининг бадиий кенгашига ўсмирлар ва катталар дунёқарашини ривожлантиришга қаратилган бир нечта сценарийларимни топширдим. Ўсмирлар муаммоси ҳамиша долзарб ва аҳамиятли бўлиб келган. Бадиий кенгаш йиғилишига таклиф этишди. “Жуда яхши сценарий, яхши фильм бўлади”, деб мақташди. “Бизга ана шундай сценарийлар керак”, дейишгани мени янада қувонтирганди. Афсуски, бу гаплар айтилганига бир неча йил бўлди. Аммо лойиҳаларнинг бирортаси олдинга силжигани йўқ. Эрон, хитой, корейс ва турк фильмлари зўр ва ҳамиша уларга талаб юқори? Ўзбек киносининг ана шу босқичга чиқишига нима тўсқинлик қиляпти? Мана шу савол мени кўп ўйлантиради.
“Кўзингни оч” фильми ўзбек киноси тараққиётида янги босқич бўлишига ва уни янги поғоналарга олиб чиқишига умид қиламан. Чунки биз ёшлар астойдил ҳаракат қиляпмиз, — дейди ёш режиссёр Гулнара Иванова.
Изоҳ (0)