“Оскар“ олган илк осиёлик актриса — Мишель Йео турмушга чиқди

“Оскар” мукофоти соҳибаси Мишел Йео Ferrari’нинг собиқ бош директори Жан Тодтга турмушга чиқди, деб ёзади “Корреспондент.нет”.

Хабарда айтилишича, жуфтлик унаштирилганидан 19 йил ўтиб, оила қуришга қарор қилган. Бу ҳақда оиланинг яқин дўсти, бразилиялик автопойгачи Фелипе Масса Instagram’даги саҳифасида маълум қилган. 

Хусусан, спортчи жуфтликнинг севги тарихи акс этган ўзига хос откритка суратини ҳам эълон қилган. Унда “Биз 2004 йилнинг 4 июнь кунида Шанхайда учрашдик. 2004 йилнинг 26 июлида эса Жан Тодт Мишелнинг қўлини сўради. У розилик билдирди. Ва мана бугун орадан 6992 кун ўтиб севимли оиламиз ва дўстларимиз даврасида биз ушбу дақиқани бирга нишонлашга қарор қилдик”, — дейилади.

Тантана вақтида 60 ёшли Мишель Йео икки хил образда намоён бўлди. Маросимнинг расмий қисмида у оқ шойи кофта-юбка кийган. 

Актрисанинг яна бир либоси қаймоқранг бежирим кўйлак бўлган. 77 ёшли куёв эса ҳаворанг галстук ва классик смокингда эди.