Польша Қуролли кучлари Бош қўмондонлигининг биринчи ўринбосари Марек Соколовский Беларусь билан чегарага жойлаштирилган полшалик вертолёт учувчилари зарурат туғилса, қурол ишлатишдан тап тортмасликларини айтди.
“Вертолётлар қуролланган ва жангга тайёр. Бизда тўлиқ ваколатга эга жуда тажрибали учувчилар бор, улар Афғонистон ва Ироқда мен билан бирга ҳаво-десант қуроллари ва ракеталарни амалда қўллаган учувчилар. Агар бирор воқеа юз берса, улар қурол ишлатишдан тортинмайдилар”, — деди Соколовский брифингда.
Қўмондон ўринбосарининг таъкидлашича, чегара ҳудудларига қуруқликдаги кучларнинг биринчи авиация бригадаси ва Польша Қуролли кучларининг 25-ҳаво кавалереяси бригадаси вертолётлари жойлаштирилган. Улар зудлик билан жавоб қайтариш режимида бўлиб, иккита позицияда туради, деди у.
1 август куни Польша Мудофаа вазирлиги Беловэтса вилоятида паст баландликда икки Беларусь вертолёти мамлакат ҳаво ҳудудини бузганини маълум қилди. Польша таҳлилчиларининг фикрига кўра, бу Ми-24 ва Ми-8 эди.
Бунга жавобан Беларусь Мудофаа вазирлиги бундай баёнот билан Польша чегара яқинида қўшинлар тўпланишини оқлашга уринаётганини маълум қилди.
Бугун, 3 август куни Польша ҳукуматининг собиқ раҳбари Влодзимеж Цимошевич РМФ ФМ радиосига берган интервьюсида ўша икки вертолёт Беларусь президентининг қўриқлаш хизматига тегишли эканлигини айтди. Минск бу маълумотларни рад қилди.
Изоҳ (0)