Қозоғистон аҳолиси интернетда Россия армияси сафига қўшилиш бўйича таклифларга дуч келмоқда. Бу ҳақда Reuters хабар берди.
Рекламада айтилишича, Россия армияси билан шартнома имзолаганлар 5300 доллар (тахминан 500 минг рубль) миқдорида бир марталик тўлов, шунингдек, камида 190 минг рубль миқдорида ойлик маош ва қўшимча тўловлар олади.
Реклама аниқ қозоғистонликларга қаратилган. Хусусан, унда Россия ва Қозоғистон байроқлари тасвирланган бўлиб, унинг ёнида “елкама-елка” шиори ўрнатилган.
Эълон Сахалиндаги армияга боришни таклиф қилувчи веб-сайтга олиб боради. Сайт Сахалин вилоятининг инсон капиталини ривожлантириш агентлиги томонидан яратилган.
На ташкилот, на Қозоғистон Ахборот ва ижтимоий ривожланиш вазирлиги журналистларнинг саволларига жавоб бермади.
Қозоғистон Жиноят кодексига кўра, республика фуқаролари хориждаги қуролли можарода қатнашгани учун беш йилдан тўққиз йилгача озодликдан маҳрум этилиши мумкин. Урушга ёллаш эса етти йилдан ўн йилгача озодликдан маҳрум қилишни назарда тутади.
Аввалроқ бундай эълонлар Волгограддаги жамоат транспортларида ўзбек тилида пайдо бўлганди. Унда ойига 200 минг рубль (тахминан икки минг доллардан ошади) ваъда қилинган даромаддан ташқари, хизматга боришни истаганлар Россия фуқаролигини соддалаштирилган тартибда олиши эслатиб ўтилади. Бундай эълонлар тожик ва қозоқ тилида ҳам чоп этилиши айтилган.
Изоҳ (0)