Машҳур ёзувчи Стивен Кингнинг Dollar Baby номли лойиҳасида ғолиб бўлиб, унинг асарини экранлаштириш ҳуқуқини 1 долларга сотиб олган ўзбекистонлик ёш режиссёр Гулнара Иванова “Дарё” га берган интервьюсида ўзбек киносидаги муаммолар ҳақида гапирди.
“Ўзбек кинематография агентлигининг бадиий кенгашига ўсмирлар ҳамда уларнинг катта ҳаётга қадами ҳақида сценарий топширгандим. Унда жараён ўсмирлар нигоҳи билан очиб берилади. Катта ҳаётда улар тўқнаш келадиган ҳолатлар ҳақида ҳам гап боради. Мени бадиий кенгаш йиғилишига чақиришди, ўзим ҳам у ерда нутқ сўзладим. Агентлик раҳбарияти яхши фильм, суратга оламиз, дейишди. Лекин мана, орадан бир неча йил ўтди. Ҳалигача жавоб йўқ. Умид қиламанки, ушбу лойиҳамга эътибор қаратишади”, — дейди режиссёр.
Гулнаранинг айтишича, у ҳозирда ўзининг тўлиқ метражли фильмини суратга олмоқда.
“Айни кунларда ‘Кўзингни оч’ номли тўлиқ метражли фильм устида ишлаяпман. Бу шу кунгача суратга олган илк тўлиқ метражли фильмим ҳисобланади. Ростини айтиш керак, бу ўзбек киносидаги анъанавий бўлмаган, мутлақо янги жанрдаги фильм ҳисобланади. Шунинг учун ҳам уни суратга олишимга аранг рухсат беришди. Фильм ҳаммага бирдек тушунарли бўлмаслиги мумкин, аммо бу у ёмон фильм дегани эмас. Назаримда, фильм шаблонларга бўйсунмаслиги, ижодкор эса эркин ижод қилиши керак. Бу фильмни бюджетсиз, фақат дўстларим ёрдамида суратга оляпман. Ва албатта, ВГИК институтининг Тошкентдаги филиали, Spectre Studio кинокомпанияси ва Ўзбекистон Давлат фильм жамғармаси ҳам ёрдам берди”, — дейди у.
“Ўзбек киноси ўлди, деган гап тез-тез қулоққа чалинади. Менимча, ҳозир ўзбек киносининг қайта тирилиш даври. Яъни ҳаммаси зўр эмас, аммо шу ерда ҳам нимадир қилишга уринаётган инсонлар бор. Муҳими, умидсизликка тушмаслик ва ҳаракатни сусайтирмаслик керак”, — дейди режиссёр.
Изоҳ (0)