Mashhur yozuvchi Stiven Kingning Dollar Baby nomli loyihasida g‘olib bo‘lib, uning asarini ekranlashtirish huquqini 1 dollarga sotib olgan o‘zbekistonlik yosh rejissor Gulnara Ivanova “Daryo” ga bergan intervyusida o‘zbek kinosidagi muammolar haqida gapirdi.
“O‘zbek kinematografiya agentligining badiiy kengashiga o‘smirlar hamda ularning katta hayotga qadami haqida ssenariy topshirgandim. Unda jarayon o‘smirlar nigohi bilan ochib beriladi. Katta hayotda ular to‘qnash keladigan holatlar haqida ham gap boradi. Meni badiiy kengash yig‘ilishiga chaqirishdi, o‘zim ham u yerda nutq so‘zladim. Agentlik rahbariyati yaxshi film, suratga olamiz, deyishdi. Lekin mana, oradan bir necha yil o‘tdi. Haligacha javob yo‘q. Umid qilamanki, ushbu loyihamga e’tibor qaratishadi”, — deydi rejissor.
Gulnaraning aytishicha, u hozirda o‘zining to‘liq metrajli filmini suratga olmoqda.
“Ayni kunlarda ‘Ko‘zingni och’ nomli to‘liq metrajli film ustida ishlayapman. Bu shu kungacha suratga olgan ilk to‘liq metrajli filmim hisoblanadi. Rostini aytish kerak, bu o‘zbek kinosidagi an’anaviy bo‘lmagan, mutlaqo yangi janrdagi film hisoblanadi. Shuning uchun ham uni suratga olishimga arang ruxsat berishdi. Film hammaga birdek tushunarli bo‘lmasligi mumkin, ammo bu u yomon film degani emas. Nazarimda, film shablonlarga bo‘ysunmasligi, ijodkor esa erkin ijod qilishi kerak. Bu filmni budjetsiz, faqat do‘stlarim yordamida suratga olyapman. Va albatta, VGIK institutining Toshkentdagi filiali, Spectre Studio kinokompaniyasi va O‘zbekiston Davlat film jamg‘armasi ham yordam berdi”, — deydi u.
“O‘zbek kinosi o‘ldi, degan gap tez-tez quloqqa chalinadi. Menimcha, hozir o‘zbek kinosining qayta tirilish davri. Ya’ni hammasi zo‘r emas, ammo shu yerda ham nimadir qilishga urinayotgan insonlar bor. Muhimi, umidsizlikka tushmaslik va harakatni susaytirmaslik kerak”, — deydi rejissor.
Izoh (0)