Қаршида кўча чироқларини ўрнатиш баҳонасида 1,3 млрд сўм талон-торож қилинди

Қашқадарё вилояти Қарши шаҳрида кредит маблағларини ўзлаштирган МЧЖ раҳбари аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Қарши шаҳар бўлими томонидан терговга қадар текширув ўтказилган. Текширув давомида “М.С.” ва “А.Ҳ.” МЧЖ таъсисчиси Ж.Т. шаҳар Ободонлаштириш бошқармаси масъул шахслари билан ўзаро тил бириктириб, Насаф кўчасида кўча чироқларни ўрнатишда расмий ҳужжатларга бажарилмаган ишларни қўшиб ёзиш орқали 1,3 миллиард сўмни ўзлаштириш йўли билан талон-торож қилгани аниқланган. Шунингдек, у 1,8 миллиард сўм солиқларни тўлашдан бўйин товлаган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 209-моддаси (мансаб сохтакорлиги) ва 184-моддаси (солиқлар ёки йиғимларни тўлашдан бўйин товлаш) билан жиноят иши қўзғатилиб, тергов ҳаракатлари ўтказилмоқда.

Кредит маблағларининг ўзлаштирилиши

Февраль охирларида Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Май ойида эса Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди. Шунингдек, Қорақалпоғистонда давлат дастури доирасида ажратилган кредит маблағлари талон-торож қилингани маълум бўлганди.