Qoraqalpog‘istonning Ellikqalʼa tumanida “Yoshlar kelajagimiz” Davlat dasturi doirasida 2019-yilda ajratilgan kredit mablag‘lari talon-toroj qilinib, qurilish ishlari bugungi kungacha yakunlanmagani haqida xabar tarqaldi. Qoraqalpog‘iston prokuraturasi holat yuzasidan bayonot berdi.
Unga ko‘ra, 2023-yil mart oyida Departamentning Ellikqalʼa tuman bo‘limi tomonidan “Yoshlar kelajagimiz” Davlat dasturi doirasida ajratilgan kreditlarning qonuniyligini o‘rganish maqsadida tergovga qadar tekshiruv o‘tkazilgani aniqlangan. 2019-yilda AT Xalq bank Ellikqalʼa filiali tomonidan “Tuproqqalʼa Tur” MCHJga yuqoridagi davlat dasturi doirasida “Ekoturizm maskani” tashkil qilish maqsadida 1 milliard 850 million so‘m imtiyozli kredit mablag‘lari ajratilgan.
Ushbu kredit “Ekoturizm maskani”ni qurish uchun haqiqatda ishlatilgani nazorat o‘lchovidan o‘tkazilganda, ajratilgan kredit mablag‘lari to‘liq ushbu obyektning qurilishi uchun sarflangani aniqlangan, shu bilan birga tadbirkor shaxsiy mablag‘lari hisobidan qo‘shimcha 5,5 milliard so‘mlik qurilish ishlarini bajargan. Bugungi kunda ushbu obyektning qurilishi uchun jami 7 milliard so‘mdan ortiq mablag‘lar sarflangan.
Tergovga qadar tekshiruv natijasiga ko‘ra, imtiyozli kreditning maqsadsiz ishlatilish holatlari aniqlanmagani bois, 18-iyunda Jinoyat protsessual kodeksining 83-moddasi 2-bandiga asosan jinoyat ishi qo‘zg‘atishni rad qilish to‘g‘risida qaror qabul qilingan. Ushbu qarorning qonuniyligi o‘rganilganda, bekor qilish uchun asoslar aniqlanmadi.
Biroq, tadbirkor barcha mablag‘larini yuqoridagi qurilish obyektiga sarflab, ajratilgan kreditni o‘z vaqtida qaytarmagani sababli, AT Xalq bank Ellikqalʼa filiali tomonidan Beruniy tumanlararo iqtisodiy sudiga daʼvo arizasi kiritilgan.
Sudning 2022-yil 17-iyundagi qaroriga ko‘ra, qarzdor “Tuproqqalʼa Tur” MCHJdan bank foydasiga 1 milliard 907 million so‘m undirish belgilangan. Hozirda, majburiy ijro byurosining Ellikqalʼa tuman bo‘limi tomonidan ijro harakatlari olib borilmoqda.
Izoh (0)