Сурхондарё вилоятининг собиқ ҳокими Тўра Боболов Тошкент вилоятининг Оққўрғон туманига ҳоким вазифасини вақтинча бажарувчи бўлди. Боболов тайинловга қадар Савдо-саноат палатаси раиси ўринбосари лавозимида фаолият юритган.
Тўра Боболов 2023 йилнинг февраль ойида бошқа ишга ўтиши муносабати билан Сурхондарё вилояти ҳокими лавозимидан озод этилганди. У 2019 йилнинг май ойидан Сурхондарё вилояти ҳокими вазифасини бажарувчи этиб тайинланган. 2020 йил январь ойида расман вилоят ҳокими лавозимига тасдиқланганди.
Тўра Боболов Сурхондарё вилояти ҳокими сифатида фаолият юритган пайтда прокурорни ҳақорат қилгани айтилган аудиолар тарқалганди. Шундан сўнг Боболов президент қарори билан ўз фаолиятини давлат сиёсати ва амалга оширилаётган ислоҳотларга мос равишда ташкил этмагани, ҳокимларга қўйиладиган талабларга риоя этмасдан, мажлис қатнашчиларини ҳақорат қилгани ва бу билан кенг жамоатчиликнинг норозилигига сабаб бўлгани учун жазолангани очиқланганди.
Сардор Умурзоқов ушбу жазони эълон қилар экан, ҳокимга қуйидагича мурожаат қилди:
Тўра Боболов, сиз ўрнак бўлмаяпсиз. Интернетда чиққан гапларни монтаж дедингиз. Лекин экспертиза сизнинг овозингизни тасдиқлади. Президентимиз топшириғи билан сизга интизомий жазо чораси сифатида ойлик иш ҳақининг 40 фоизи миқдорида жарима қўлланди. Тегишли мутассаддилар Сурхондарё вилоятини комплекс ўргансин, муаммоларга ечими билан таклиф тайёрласин, керак бўлса, аниқланган қонунбузилишлар юзасидан жиноий иш очишгача бўлган чоралар кўрилсин.
Шундан сўнг кўп ўтмай Тўра Боболов вилоят ҳокими лавозимидан олиниб, ўрнига Тошкент шаҳар прокурори Улуғбек Қосимов тайинланганди
Изоҳ (0)