Россияда америкалик журналист қўлга олинди. У жосусликда айбланмоқда
Россия Федерал хавфсизлик хизмати Екатеринбургда АҚШ фуқароси, The Wall Street Journal мухбири Эван Гершковичнинг жосусликда гумон қилиниб ҳибсга олингани ҳақида хабар берди, деб ёзмоқда Meduza.
ФХХ маълумотларига кўра, Гершкович “Америка томонининг кўрсатмаси бўйича ҳаракат қилиб, Россия ҳарбий-саноат мажмуаси корхоналаридан бирининг фаолияти тўғрисида давлат сири ҳисобланган маълумотларни йиғган. Журналист ’махфий маълумот олишга уринаётганда’ қўлга олинган”, — дейилади хизмат хабарида.
Унга нисбатан айғоқчилик бўйича жиноий иш қўзғатилган. Бу модда 20 йилгача қамашни назарда тутади.
Дастлаб Гершкович Екатеринбург шаҳрида бедарак йўқолгани ҳақида хабар берилганди. Шаҳарда журналистга ҳамроҳлик қилган маҳаллий пиарчи Ярослав Ширшиковнинг сўзларига кўра, Гершкович Екатеринбургга “Вагнер” хусусий ҳарбий компанияси ва “махсус операция” ҳақида материал ёзиш учун келган.
“У мана шундай катта экспедиция учун келганди. Уни қизиқтирган энг муҳим нарса ’Вагнер’ гуруҳи ва умуман ’махсус операция’га бўлган муносабат эди. Иммиграция бошқармаси бизга Екатеринбургда ким билан гаплашиш кераклигини айтди. Нега Екатеринбург? Чунки (’Вагнер’ асосчиси Евгений) Пригожин бир неча марта Екатеринбург раҳбариятини махсус операцияни бузишда айблаган ва у ердан уни ҳайдаб юборишган. Эван ҳеч қаерда (сафари ҳақида) оммага очиқ ёзмаган, мен уни турли маърузачиларнинг чиқишида саҳна ортига олиб бордим, провокациядан қочишга муваффақ бўлдим. Умуман олганда сафардан унинг кўнгли тўлганди”, — деди Ширшиков.
29 март куни тушдан кейин Урал оммавий ахборот воситаларида Екатеринбургда хавфсизлик кучлари бир эркакни ҳибсга олгани ҳақида хабарлар пайдо бўлди. Ширшиков ҳибсга олинган шахс Гершкович эканини тахмин қилди.
Свердловск вилояти губернатори маъмуриятининг норасмий Telegram-каналида ҳам Гершкович ҳақида шундай пост қўйилди: “Кеча Wалл Street Journal журналисти Эван Гершкович ҳақиқатан ҳам Екатеринбургда ҳибсга олинган. Вазият жуда жиддий”.
Эван Гершкович қарийб олти йилдан бери Россияда яшайди ва Американинг The Wall Street Journal газетасининг Москвадаги бюросида ишлайди. Журналист Россия Ташқи ишлар вазирлиги томонидан аккредитациядан ўтган. Грешкович аввал Agence Frans-Presse, The Moscow Times ва The New York Times газеталарида ишлаган. Гершковичнинг охирги мақоласи 28 март куни The Wall Street Journal нашрида чоп этилган.
