Буюк Британия “Вагнер” хусусий ҳарбий компаниясини террорчи ташкилот сифатида қора рўйхатга киритиш режасини тўхтатди. Бунга июнь ойида Евгений Пригожин кўтарган исён ва Россия президенти Владимир Путиннинг гуруҳ Россия давлатига бевосита алоқадор экани ҳақидаги баёнотлари сабаб бўлди, деб ёзмоқда Британиянинг The Times газетаси.
“Вагнер”ни қора рўйхатга қўшишнинг ҳуқуқий асослари бошидан қийин эди, чунки гуруҳ “ҳарбий тузилма” сифатида ҳаракат қилган, аммо Пригожиннинг “амнистияси”дан кейин вазият янада мураккаблашди, деб ёзади газета.
Путин 27 июнь куни Мудофаа вазирлиги ҳарбий хизматчилари билан учрашувда Россия давлати “Вагнер”нинг мавжудлигини сақлаб туришни тўлиқ таъминлаганини тан олди, ваҳоланки, илгари расмийлар гуруҳни молиялаштиришга алоқадорлигини бир неча бор рад этган.
Путиннинг сўзларига кўра, 2022 йилнинг майидан 2023 йилнинг майигача “Вагнер” аъзоларини ушлаб туриш ва рағбатлантириш учун бюджетдан 86 миллиард рубль, суғурта тўловлари учун яна 110 миллиард рубль ажратилган.
Шу билан бирга, гуруҳ эгаси — “Konkord” компанияси армияни озиқ-овқат маҳсулотлари билан таъминлаш учун давлатдан 80 миллиард рубль олди, дейди Путин
The Times нашрининг Британия ҳукуматидаги манбаларига кўра, компаниянинг қора рўйхатга киритилиши Россия ҳукумати идораларидан бирининг фаолиятини тақиқлашга тенгдир, бу эса “жуда ноодатий ҳамда қатор дипломатик ва ҳуқуқий асоратларга бой бўлади”.
Шу билан бирга, Британия ички ишлар вазири Суэлла Браверман ва хавфсизлик бўйича давлат котиби Том Тугендхат “Вагнер” гуруҳини террорчи ташкилот деб эълон қилиш йўлини қидиришда давом этмоқчи, деб ёзади газета.
Бундай чора Британия фуқароларига гуруҳга алоқадор йиғинларда қатнашишни, уни қўллаб-қувватлашга чақиришни, унинг рамзларини омма олдида намойиш қилишни тақиқлайди, бу эса “Вагнер”ни ИШИД ва “Ал-Қоида” сингари террористик гуруҳлар билан бир қаторга қўяди.
Бундан ташқари, молиявий санкциялар жорий этилади, “вагнерчи”лар Британия судлари хизматларидан фойдалана олмайди, шунингдек, Британия молия институтлари орқали бойлик тўплай олмайди, деб ёзади газета.
Изоҳ (0)