Президент Жо Байден Тайванга 345 миллион доллар миқдорда ҳарбий ёрдам ажратилишини эълон қилди. Хитойнинг АҚШдаги элчихонаси Вашингтонни Тайванга қурол-яроғ беришдан бош тортишга чақирди.
Пул Пентагоннинг мудофаа маҳсулотлари ва хизматлари, ҳарбий соҳадаги таълим ва кадрлар тайёрлаш соҳалари учун ажратилади, дейилади Оқ уй баёнотида. Reuters хабарига кўра, пакетга тўртта МҚ-9А разведкачи учувчисиз самолёти кириши мумкин, бироқ ҳозирча улардан фақат америкалик ҳарбийларгина фойдаланиши мумкин бўлган замонавий жиҳозларни олиб ташлаш масаласи ишлаб чиқилмоқда.
Хитойнинг Вашингтондаги элчихонаси бу қарорни танқид қилди.
“АҚШ “Ягона Хитой принципи” ва “Хитой-АҚШ” учта қўшма коммюникасига амал қилиши ва Тайванга қурол сотишни тўхтатиши, Тайван бўғозида кескинликка олиб келиши мумкин бўлган янги омилларни яратишни тўхтатиши, Тайван бўғозида тинчлик ва барқарорликка таҳдид солишини бас қилиши керак", - деди дипломатик миссияси вакили Лиу Пенгю.
Изоҳ (0)