АҚШ ва Япония Хитой ва Тайван ўртасида қуролли можаро юзага келган тақдирда “бирлашган оператив режа”ни ишлаб чиқишга ҳаракат қилмоқда, деб ёзди The Wall Street Journal (WSJ) манбаларга таяниб.
Нашрга кўра, Вашингтон Токиони Тайван яқинидаги Хитой сувости кемаларини “овлаш”да иштирок этишга ундамоқда.
WSJ аниқлик киритишича, АҚШ ва Япония бир йилдан ортиқ вақт давомида режа устида ишламоқда. Улар қурол-яроғ етказиб бериш йўллари, ракета ўрнатиш майдончалари ва қочқинларни эвакуация қилиш режаларини муҳокама қилмоқда, дейилади мақолада.
Нашрнинг таъкидлашича, Япония АҚШ армиясини ёнилғи ва “бошқа ресурслар” билан қўллаб-қувватлашга тайёрлигини маълум қилган, аммо Вашингтон бу борада масалага “кўпроқ ойдинлик киритмоқчи”.
Пентагон матбуот котибининг WSJ’га айтишича, АҚШ ва Япония Тайван бўғозида тинчлик ўрнатиш масаласида ҳамфикр ва Вашингтон Токионинг “ўз роли, миссиялари ва имкониятларини кенгайтиришдан” манфаатдорлигини маъқуллайди, бу эса Хитойни “тийиб туришни кучайтиради”.
Томонлар можаро юзага келган тақдирда режа тайёрлаяптими ёки йўқми, деган саволга Япония ҳукумати вакили мамлакатларнинг “қўшма мудофаа режалари” борлигини айтди, аммо тафсилотларни маълум қилмади.
Изоҳ (0)