АҚШнинг Сан-Франциско шаҳри мерияси Twitter бош қароргоҳи томига ўрнатилган улкан Х белгиси юзасидан шикоят аризаси билан мурожаат қилди ва текширув бошлади. Бу ҳақда Associated Press ёзмоқда.
Гап шундаки, бино шаҳар марказида жойлашган, унга йирик объектларни ўрнатиш учун уларнинг бино дизайнига мувофиқлиги ҳақида, шунингдек, маҳкамлагичларнинг ишончлилиги ҳақида хавфсизлик рухсатномаси талаб қилинади.
Ижтимоий тармоқ эгаси Илон Маск ҳафта бошида кўк қуш тасвирланган эски логотипни Х ҳарфли янги логотипга ўзгартирган эди. Ишчилар бош қароргоҳ биносидан эски логотипни олиб ташлашга киришган, бироқ тегишли рухсатномаларга эга бўлмагани учун полиция уларни тўхтатган. Бундан ташқари, ишчилар хавфсизлик нуқтаи назаридан демонтаж қилинадиган майдон остидаги пиёдалар йўлагини тўсмаган эди. Ҳозир “er” [Twitter сўзидаги] ҳарфлари ўчирилмаган ҳолда қолмоқда.
Маск Twitter номини Х деб ўзгартириш режалари ҳақида 1 июнь куни гапирганди. У келажакда ижтимоий тармоқнинг функционал имкониятлари кенгайиши, шу сабабли Twitter бренди бунга мос тушмаслигини айтган. Шунингдек, у янгиланадиган платформада эски Twitter’га қараганда узунроқ постлар, видеолар чоп этиш, хабарлар алмашиш ва молиявий хизматлардан фойдаланиш имкони бўлишини маълум қилган.
“Ижтимоий тармоқ жадал ривожланади, у мураккаб алоқа ва молиявий бошқарув учун имкониятлар яратади. Twitter номи бу контекстга мос эмас, шунинг учун биз қуш билан хайрлашишга мажбур бўлдик”, — деб тушунтирган Маск.
Изоҳ (0)