Ўзбекистонда меҳнат ҳақлари 2023 йил биринчи ярмида ўтган йилнинг мос даврига нисбатан 6,5 фоизга ўсди. Бу ҳақда Марказий банк раиси Мамаризо Нурмуродов маълум қилди, дея хабар бермоқда “Дарё” мухбири.
Мамаризо Нурмуродовнинг айтишича, иш ҳақининг ўсиши бир қатор соҳаларда талабни оширмоқда.
“Иқтисодиётда меҳнат ҳақларининг реал ҳисобда кенг қамровли ўсиши кузатилди. Яъни 2023 йил биринчи ярмида ўтган йилнинг мос даврига нисбатан 6,5 фоиз ўсиш кузатилди. Аҳоли даромадларининг кўпайиши уй-жой, мебел, автомобиль, узоқ муддат фойдаланиладиган товарлар ва хизматлар соҳасига бўлган талабни оширмоқда. Аҳолининг реал даромадларининг ўсишини барча соҳаларда кузатилаётгани, бир томондан, иш ҳақи харажатлари орқали ишлаб чиқариш ҳамда хизмат кўрсатиш таннарх харажатларининг ошишига олиб келса, иккинчи томондан, истеъмол талабини рағбатлантирувчи асосий драйверлардан бўлмоқда” , — деди Мамаризо Нурмуродов.
 (2).png)
Марказий банк раисининг қўшимча қилишича, аҳоли ва тадбиркорларнинг инфляцион кутилмалари ҳамон инфляция даражасидан юқори шаклланмоқда ва июнь ойида 13—13,5 фоизни ташкил қилган.
“Аҳолининг валюта курси ўзгариши, иш ҳақи ва нафақалар ошишининг нархларга таъсири кўчайиши борасидаги кутилмалари ортган. Истеъмол талабининг ошишига чакана кредитларнинг сезиларли даражада ўсиш динамикаси ҳам таъсир кўрсатмоқда”, — деди у.
Жорий йилнинг 6 ойида банклар томонидан 116 триллион сўмлик, ўтган йилнинг мос даврига нисбатан 1,3 баробарга кўп кредитлар ажратилган. Ушбу ўсишни асосан аҳолига ажратилаётган чакана кредитлар қўллаб-қувватламоқда. Июнь ойи якунлари бўйича аҳолига ажратилган кредитлар (46 триллион сўм) ўтган йилнинг мос даврига нисбатан 1,7 баробарга ўсган. Бунда, аҳолининг автокредитлар, микроқарз, микрокредит ҳамда ипотека кредитларига талаби юқори бўлди.
Изоҳ (0)